Yeddi şəhid verən Göytəpə məktəbinin ACINACAQLI VƏZİYYƏTİ: Bu cür daxmada təhsil almaqla sağlam gələcək yetişdirmək olar? - VİDEO
Təəssüflər olsun ki, Azərbaycanda hələ də elə təhsil ocaqları var ki, sözün əsl mənasında "tövlə"ni xatırladır. Doğrusu, bu cür bərbad vəziyyətdə olan və daxmaya bənzəyən tikililərə nəinki təhsil ocağı, hətta məktəb də deməyə adamın dili gəlmir. Amma hələ də xarabalığı xatırladan bu cür tikililərdə təhsil alan, elmin sirrlərinə yiyələnən, nüfuzlu universitetlərə qəbul olunan və hətta ən uca zirvə sayılan şəhidlik məqamına yüksələn şagirdlər var.
TəhsilMedia.az xəbər veri ki, adı məktəb olan, özü isə sözün əsl mənasında xarabalığı xatırladan təhsil müəssisələrindən biri də Cəllabadın Göytəpə şəhər məktəbidir. Qeyd edək ki, 2 əsrə yaxın tarixi olan bu tikilidə təxminən 2 mindən artıq şagird təhsil alır. Ancaq məktəbin nə qapı-pəncərəsi, nə istilik sistemi, nə tavanı, nə də ki döşəməsi normal vəziyyətdədir. Belə ki, pəncərə və qapılar sınıqdır, döşəmənin taxtaları isə çürüdüyündən adam üzərində gəzməyə qorxur. Belə bir vəziyyətdə məktəbdə təhsil almaq, yaxud tədris etmək müşkül məsələ olduğundan həm müəllimlər, həm də şagirdlər əziyyət çəkirlər. Hələ qışın soyuğunda, şaxtanın sazağında sinif otaqlarında oturmaq demək olar ki, mümkün olmur.
Göytəpə sakinlərinin sözlərinə görə, məktəbin təmiri ilə bağlı rayonun Regional Təhsil İdarəsinə müraciət etsələr də, şikayətlərini dinləıyən və diqqət göstərən yoxdur. Odur ki, şagirdlər illərdir ki, bu acınacaqlı vəziyyətdə olan məktəbdə elmin sirrlərinə yiyələnməyə məcburdurlar. Hərçənd bu cür bərbad vəziyyətdə olan məktəbdə buna nə dəırəcədə nail olub-olmadıqları da sual altındadır. Hər şeyə rəğmən adıçəkilən təhsil ocağı 44 günlük Vətən Müharibəsində 7 şəhid verib. Sakinlərin sözlərinə görə, Təhsil naziri Emin Əmrullayevə müraciət edərək məktəbin təmir olunması və yenidən qurulmasını xahiş etsələr də, hələlik heç bir nəticə yoxdur. Amma bu məktəbin torpaq uğrunda 7 şəhid verdiyini nəzərə alsaq, eləcə də gələcəkdə vətənpərvər gənclərin yetişəcəyini düşünsək, o zaman təhsil müəssisəsini təmir etdirmək və burada oxuyan şagirdlərin şəraitini yaxşılaşdırmaq aidiyyatı qurumların birinci vəzifəsi olmalıdır. Ancaq təəssüflər olsun ki, aidiyyatı qurumlar edilən müraciətlərə biganə yanaşaraq sağlam gələcəyimizin yetişməsinə göz yumurlar. Təhsil isə hər bir millətin gələcəyidir. Bəs görəsən, bu cür daxmalarda təhsil almaqla sağlam gələcək yetişdirmək mümkündürmü? Təhsil Nazirliyi və Regional Təhsil İdarəsi bu barədə düşünsə, yaxşı olar.
Müşviq Tofiqoğlu,
TƏHSİL MEDİA
