Tarix və biologiya fənləri üzrə işçi qruplarının növbəti iclasları keçirilib
Bu gün Dövlət İmtahan Mərkəzində tarix və biologiya fənləri üzrə işçi qruplarının növbəti iclasları keçirilib.
DİM-dən "tehsilmedia.info"a bildirilib ki, tarix fənni üzrə gündəlik məsələ Azərbaycan ordusunun Qarabağda həyata keçirdiyi antiterror tədbirlərinə həsr edilmiş elmi‑metodiki məqalənin, biologiya fənnindən isə qəbul imtahanı modelinə uyğun sınaq imtahanı üçün hazırlanmış tapşırıqların müzakirəsinin davamı olub.
Tarix fənni üzrə iclasda “2023-cü il 19-20 sentyabrda Azərbaycan ordusunun Qarabağ bölgəsində lokal xarakterli antiterror tədbirləri” adlı elmi-metodiki məqalənin müzakirəsi başa çatıb. 2024-cü ildə ali təhsil müəssisələrinə II və III ixtisas qrupları üzrə qəbul imtahanlarında bu materiala dair də tapşırıqlardan istifadə edilməsi nəzərdə tutulur. Məqalə yaxın günlərdə dim.gov.az saytında yerləşdiriləcək. Həmçinin məqalə “Abituriyent” jurnalının 2-ci sayında dərc ediləcək.
Biologiya fənni üzrə iclasda isə sınaq imtahanı üçün təqdim edilmiş, qəbul proqramı və ümumtəhsil müəssisələrində qüvvədə olan 6‑11-ci sinif dərslikləri əsasında hazırlanmış tapşırıqların müzakirəsi yekunlaşıb. Hər bir tapşırıq müvafiq fənn kurikulumunun təlim nəticəsinə və istifadədə olan dərsliklərə uyğunluq baxımından təhlil edilib və variant formalaşıb. Bu variant otk.az sınaq imtahanı platformasına təqdim ediləcək.
İclaslarda qeyd olunan məsələlərlə bağlı iştirakçılar fikirlər bildirib və təkliflər veriblər.
İşçi qruplarının növbəti iclasları 26 oktyabr 2023-cü il tarixində olacaq.
