LDU-nun tələbəsi idman sahəsi üzrə respublika birincisidir

Bu gün Lənkəran Dövlət Universitetinin tələbələri təkcə təhsil uğurları ilə deyil, həm də idman sahəsində qazandıqları nailiyyətlərlə təhsil aldıqları ali təhsil ocağına başucalığı gətirirlər.


tehsilmedia.info xəbər verir ki, belə tələbələrdən biri də LDU-nun İqtisadiyyat və idarəetmə fakültəsinin V tədris ili tələbəsi Mahmudov Ceyhun Kamil oğludur. Ceyhun Mahmudov Azərbaycan Respublikası Milli Paralimpiya Komitəsinin parapauerliftinq idman növü üzrə milli komandasının 54 kq çəki dərəcəsində üzvüdür.


Ceyhun Mahmudov 1992-ci ildə Bakı şəhərində anadan olub. Fiziki məhdudiyyətlərinə görə çətin də olsa, idmanla mütəmadi məşğul olub, əzmkarlığı sayəsində bir çox idman uğurlarına imza atıb. Belə ki, 29 aprel-01 may 2023 tarixlərində Gürcüstanın Tbilisi şəhərində keçirilən parapauerliftinq idman növü üzrə dünya kubokunda 54 kq çəki dərəcəsində fərdi kateqoriyada 152 kq nəticə göstərərək qızıl medal qazanıb. Həmçinin Ceyhun Mahmudov ümumi kateqoriyada 3 cəhdin-142 kq,147 kq, 152 kq cəmində 441 kq nəticə göstərərək daha bir qızıl medal əldə edib. Bu qalibiyyət idmançıya 2023-cü ilin avqust ayında parapauerliftinq idman növü üzrə Birləşmiş Ərəb Əmirliklərində keçiriləcək dünya çempionatına lisenziya qazandırıb.


Qeyd edək ki, Ceyhun Mahmudov 54 kq çəki dərəcəsində parapauerliftinq idman növü üzrə Azərbaycan respublikası birincisidir.