Rusca bilməyən valideynlərin rus bölməsində oxuyan uşaqları

Cəmiyyətdə populyar və aktual olan mövzulardan biri də ailələrin övladlarını erkən yaşlarda rus-dilini öyrənməyə təşviq etməsidir. Bunun üçün valideynlər övladlarını ya rusdilli bağçalara ya da məktəbin rus təmayüllü qruplarına yerləşdirirlər. Buna görə də, rusdilli sektorlara tələbat böyükdür. Valideynlər bir çox hallarda özləri rusca bilmədən istəyirlər ki, uşaqları bu dili öyrənib, bu dildə danışsınlar. Lakin bu hal həm uşaqlara, həm də valideynlərin özlərinə bir sıra problemlər yaradır.

tehsilmedia.info xəbər verir ki, ekspert Adil Vəliyev bildirib ki, valideynlərin fikrinə görə, övladları rus sektorunda oxuyarsa, daha yaxşı təhsil alacaqlar.
Amma çox vaxt gedişat heç də valideynlərin düşündüyü kimi olmur. Təhsil eksperti Elçin Əfəndinin sözlərinə görə, bu halda uşaqlar dillə bağlı zərbə almış olur. Onlar ibtidai sinifdə oxuduqları müddətdə bu dili mənimsəyə bilmirlər.
Nəticə etibarilə valideyn övladının təhsildən yayınmasına səbəb olur.
Rus bölməsinin müəllimi Vüsalə Həsənova bildirib ki, yuxarı siniflərdə belə bu problem davam etməkdədir.
Nəticədə uşaqlar nə rus dilini, nə də digər fənləri qavraya bilir. Dili bilməyən valideynlər uşaqlarının dərslərinə kömək edə bilmədiyi üçün problemin miqyası daha da böyüyür.
Adil Vəliyevin sözlərinə görə, valideynlər düşünməlidir ki, mən bu dili bilmirəmsə, övladıma dərslərində necə köməklik edə bilərəm?
Valideyn öz övladının gələcəyi ilə oynamalı deyil.
Şagirdlərin 4-cü sinifi bitirdiyi zaman keçirilən monitorinqdə nəticələr özünü göstərir. Valideynlər övladlarının rus dilini bilərsə, gələcəkdə daha asan iş tapar arqumentini söyləyirlər.
Elçin Əfəndi isə bu fikrin çox absurd olduğunu qeyd edib. Həmin uşaqlar 11-ci sinfi bitirəndə ölkədə rus dilindən istifadənin faizini indidən proqnazlaşdırmaq olmaz.
Əlavə dil bilmək üstünlükdür. Lakin bu uşaqların təhsilində problem yaratmamalıdır.
Ekspertlər də deyir ki, uşaqların özünə və ailəsinə yad olan bir dildə təhsil alması gələcəyinə ziyandır.

TƏHSİL MEDİA