Şərqşünaslıq İnstitutu əməkdaşının Ulu Öndər haqqında məqaləsi Misirdə dərc olunub

AMEA-nın akademik Ziya Bünyadov adına Şərqşünaslıq İnstitutunun Ərəb filologiyası şöbəsinin müdiri filologiya üzrə fəlsəfə doktoru, dosent Xumar Ələkbərovanın Ümummilli Lider Heydər Əliyevin anadan olmasının 100 illik yubileyi münasibətilə hazırladığı “Qərb-Şərq sivilizasiyalarının qovşağında yer alan Azərbaycan elminin himayədarı Heydər Əliyev” adlı məqaləsi Misir Ərəb Respublikasının Mədəniyyət xəbərləri internet portalında dərc olunub.

Bu barədə "tehsilmedia.info"a institutdan məlumat verilib.

Məqalədə qeyd edilib ki, Heydər Əliyev bu gün dünyada zəngin irsi, kəşfləri, nailiyyətləri ilə tanınan Azərbaycan elm tarixinə elm hamisi olaraq öz adını yazmış şəxsiyyətdir. Ulu Öndər bütün fəaliyyəti dövründə elm və təhsilin inkişafına xüsusi qayğı ilə yanaşıb. Bu gün dünyanın hesablaşdığı Azərbaycanın nailiyyətlərinin bünövrəsində Heydər Əliyevdən miras qalan elmə, tərəqqiyə dəyər, qayğı durur. İftixar hissi və əminliklə qeyd edə bilərik ki, Heydər Əliyevin elm siyasəti Prezident İlham Əliyev tərəfindən uğurla davam etdirilir. Azərbaycan Prezidentinin “Müasir dövlətin qurulması elmin inkişafı olmadan mümkün deyildir” proqram xarakterli müdrik fikri regionun hər bir sahədə gücü olan Azərbaycan dövlətinin gələcək tərəqqisi üçün ən böyük təminatdır.

Qeyd edək ki, şərqşünas alim bu məruzə ilə Şərqşünaslıq İnstitutu və İraq Respublikası Strateji Araşdırmalar Mərkəzinin təşkilatçılığı ilə Ümummilli Liderin 100 illik yubileyinə həsr olunmuş və Bakıda İraq, Qırğızıstan, Qazaxıstan və Belarusdan 81 alimin iştirakı ilə keçirilən “Heydər Əliyev və müasir Şərq” mövzusunda beynəlxalq elmi konfransda çıxış edib. Onun məruzəsi maraqla qarşılanıb.