Bu il tibbə qəbul olmaq çətinləşəcək - keçid balı bu qədər arta bilər

"Bu il biz gözləyirik ki, tibb ixtisasında keçid balı təxminən 20 bal artsın".

Tehsilmedia.com xəbər verir ki, bu sözləri Dövlət İmtahan Mərkəzinin İdarə Heyətinin sədri Məleykə Abbaszadə DİM-in “YouTube” və “Facebook” səhifələrində ixtisas seçimi edəcək abituriyentlərin diqqət yetirməli olduğu vacib məqamlarla bağlı canlı yayımda səsləndirib.

O bildirib ki, 600 baldan yuxarı nəticə göstərən 1212 nəfərin hamısı istədiyi tibb ixtisasına qəbul ola bilməyəcək:

“IV ixtisas qrupunda 600 baldan yuxarı nəticə göstərənlər əsasən tibb ixtisaslarına namizəddir. Onların sayı 1212 nəfərdir. Aydın məsələdir ki, onların hamısı istədiyi tibb ixtisasına qəbul ola bilməyəcək.

Azərbaycan Tibb Universitetində müxtəlif ixtisaslar var: ictimai səhiyyə, əczaçılıq, stomatologiya və s. Amma əsas müsabiqə vəziyyəti tibb ixtisasına aiddir.

Keçən il tibb ixtisası üzrə keçid balları yüksək idi. Bu il biz gözləyirik ki, tibb ixtisasında keçid balı təxminən 20 bal artsın. 600 baldan yuxarı olan keçid balları 20 bal arta bilər. 500 baldan yuxarı intervalda isə keçən il formalaşan balların bu il təxminən 10 bal artacağını gözləyirik.

Keçən il 400 baldan yuxarı nəticə ilə hansısa ixtisaslarda keçid balları formalaşmışdısa, bu il həmin ixtisaslarda təxminən eyni balların formalaşmasını gözləyirik. 300-400 bal intervalında isə təxminən 10 bal artım ola bilər.

200-300 bal intervalında keçənilki keçid ballarının formalaşa biləcəyini görürük. Bu, çox böyük ehtimalla belə olacaq.

150 baldan yuxarı nəticə göstərənlərin sayı 5419 nəfərdir. Onların hamısı düzgün seçim etsələr, demək olar ki, cəmi 300 nəfər qəbul olunmayacaq.

Amma biz bilirik ki, kifayət qədər yüksək bal toplayan 400, hətta 500 ballı abituriyentlər yalnız tibb ixtisaslarını seçəcəklər. Kənd təsərrüfatı ixtisaslarını seçə də bilərlər, seçməyədə bilərlər. Mən onlara məsləhət görərdim ki, həmin ixtisasları da seçsinlər. Amma onlar yəqin ki, kənarda qalacaqlar, çünki yerlər azdır".