DİM sədri: Təhsildə rəqəmlərdən çox onların mesajını oxumaq lazımdır

"Təhsil haqqında müzakirələrdə çox vaxt rəqəmlərin özünə baxırıq, amma onların bizə nə söylədiyini kifayət qədər müzakirə etmirik".

AzEdu.az xəbər verir ki, bu sözləri Dövlət İmtahan Mərkəzinin İdarə Heyətinin sədri Məleykə Abbaszadə rəsmi feysbuk hesabında qeyd edib.

"Halbuki hər bir statistikanın arxasında təhsil sisteminin vəziyyəti, inkişaf meyilləri və qəbul etməli olduğumuz qərarlar dayanır. Məlumat yalnız dərc olunmaq üçün deyil, düzgün şərh olunmaq və gələcək qərarlara əsas yaratmaq üçün dəyərlidir.

Bu səhifədə mütəmadi olaraq Dövlət İmtahan Mərkəzinin fəaliyyəti çərçivəsində formalaşan statistik məlumatları, onların təhlilini və bu məlumatların təhsil siyasəti baxımından nə ifadə etdiyini paylaşmağa çalışacağam.

Bu yanaşmanın ən yaxşı nümunələrindən biri də uzun illərdir nəşr olunan "Abituriyent 12" jurnalıdır. Burada imtahan nəticələri ilə yanaşı, regionlar, məktəblər, tədris dilləri, gender, nəticələrin paylanması və illər üzrə dəyişən meyillər haqqında zəngin məlumat təqdim olunur (dim.gov.az/az/fealiyyet/tetqiqat/statistik-tehlil). Bu məlumatlar təhsil sistemini daha dərindən anlamaq üçün qiymətli mənbədir.

Mənim üçün təhsildə qiymətləndirmənin əsas məqsədi yalnız nəticələri ölçmək deyil, sistemi daha yaxşı anlamaqdır. Çünki yüksək nəticələr sistemin potensialını, orta nəticələr onun ümumi vəziyyətini və aşağı nəticələr isə diqqət və dəstəyə daha çox ehtiyac olan istiqamətləri göstərir.

İnanıram ki, məlumatlara əsaslanan peşəkar müzakirələr təhsil sisteminin inkişafına və daha sağlam qərarların qəbuluna töhfə verə bilər. Ümid edirəm ki, bu səhifə də məhz belə bir dialoq üçün faydalı platformaya çevriləcək", - deyə M.Abbaszadə bildirib.