Dəhşət!!! Məktəbli qızın atası özünü pəncərədən A. TDI.

Babək rayonunda məktəbli X. Əliyevanın sinif yoldaşlarının qarşısında təhqir olunduqdan sonra özünü məktəbin üçüncü mərtəbəsindən atdığı bildirilir.

Atası Səfa Əliyev qızının intihara cəhd etməyə sövq edildiyini iddia edir və hadisəyə görə məktəb rəhbərliyi ilə polis əməkdaşını məsul sayır.

Məktəblinin həyatını xilas etmək mümkün olsa da, atası onun hələ də ağır xəsarətlərin fəsadlarından əziyyət çəkdiyini bildirir.

Səfa Əliyev “Gündəlik Naxçıvan”a deyib ki, hadisə mayın 20-də Babək rayon 2 nömrəli tam orta məktəbdə şagirdlərin çantalarında kosmetik vasitələrin olub-olmadığını müəyyənləşdirmək məqsədilə keçirilən yoxlamadan sonra baş verib.

Onun sözlərinə görə, Naxçıvan Təhsil Nazirliyinin təşkil etdiyi yoxlamaya polis əməkdaşı da cəlb olunub:

“Qızım həmin vaxt sinifdə olmayıb, test yoxlanışında idi. Yoxlamada polis əməkdaşı, Təhsil Şöbəsinin əməkdaşı Rüstəm müəllim, məktəbin direktoru Aynurə Fətullayeva və direktor müavini Nəsimi müəllim iştirak ediblər.

Polis əməkdaşı şagirdlərin içində onun çantasını açıb içindəkiləri partanın üstünə töküb. İdman şalvarını silkələyəndə pomada və qaş düzəltmək üçün istifadə olunan kosmetik vasitələr tapılıb. Bundan sonra direktor qızımı çağırıb şagirdlərin qarşısında ağır söyüşlərlə təhqir edib.

Deyib ki, polis onun şəklini çəkib divara vuracaq. Sonra həyat yoldaşıma zəng edərək bildirib ki, qızınızın adı şöbəyə düşüb, şəklini çəkib şöbəyə vuracaqlar”.

Səfa Əliyevin sözlərinə görə, baş verənlərdən sonra qızı ciddi sarsıntı keçirib:

“ Qızım özünü pis hiss etdiyini deyib, lakin ona evə gəlməyə icazə verilməyib. Bundan sonra üçüncü mərtəbəyə qalxıb. Bir saatdan artıq orada oturub ağlayıb, amma heç kim onunla maraqlanmayıb.

Sonra özünü üçüncü mərtəbədən ataraq intihara cəhd edib. Təcili yardım gələndə nə bir müəllim, nə də təhsil işçisi yaxınlaşıb. Bizə də zəng edib məlumat verməyiblər. Mənə sonradan təcili yardımın sürücüsü zəng vurub xəbər verdi. Xəstəxanaya çatanda məktəbdən heç kim orada yox idi”.

Atası bildirir ki, məktəbli hadisə nəticəsində ağır xəsarətlər alıb və may ayında əməliyyat olunub:

“Qızımın çanaq sümüklərində qırıqlar var idi, qolu qırılmışdı, onurğası ciddi zədələnmişdi. Əməliyyat olundu, amma qolundakı və çanağındakı qırıqlar hələ də tam bərpa olunmayıb. Onurğasındakı zədənin də fəsadları qalıb.

Qızım hələ də həmin hadisənin psixoloji təsirindən çıxa bilməyib”.

Səfa Əliyevin sözlərinə görə, ailə hadisə ilə bağlı Babək Rayon Polis Şöbəsinə şikayət edib və araşdırma aparılıb. Lakin daha sonra işin bağlandığı bildirilib:

“Babək Rayon Polis Şöbəsinə şikayət etdik, araşdırma aparıldı. Prokurorluqda Sənan müəllimin yanında oldum. O mənə dedi ki, işi bağlamışam, artıq heç kim aça bilməz. Naxçıvan Təhsil Nazirliyi də indiyədək heç bir tədbir görməyib”.

Ata aidiyyəti qurumlardan hadisənin yenidən, obyektiv və hərtərəfli araşdırılmasını, qızına qarşı təhqir və psixoloji təzyiq göstərən, eləcə də onun vəziyyətinə laqeyd yanaşan şəxslərin məsuliyyətə cəlb olunmasını tələb edir.