Magistraturaya ixtisas seçimi başlayır
Dövlət İmtahan Mərkəzi “Magistr” jurnalının 3-cü nömrəsinin elektron versiyasını təqdim edib.
AzEdu.az xəbər verir ki, jurnalın elektron versiyasını (PDF formatda) www.abiturient.az saytında əldə edə bilərsiniz.
Jurnalın bu nömrəsində "Magistratura səviyyəsi üzrə ixtisaslaşma seçimi cədvəli" əksini tapıb.
Bu cədvəldən necə istifadə etməli?
Cədvəlin 1-ci sütununda bakalavr ixtisaslarının siyahısı verilib. Bakalavr bu siyahıdan bitirdiyi ixtisası tapır. Qarşıdakı 2-ci sütunda hər bir bakalavr ixtisasına uyğun olan magistratura ixtisaslaşmalarının adları qeyd olunub, 3-cü sütunda müvafiq qəbul proqramının nömrəsi, 4-cü sütunda isə ixtisaslaşma seçiminə buraxılmaq üşün tələb olunan minimal bal göstərilib. Bakalavr 3-cü sütünda göstərilən müvafiq proqramlara aid ixtisaslaşmaları seçə bilər. Yaxın günlərdə “Magistr” xüsusi buraxılışının 4-cü sayında ali təhsil müəssisələrinin magistraturalarına qəbul aparılan ixtisaslaşmalar üzrə qəbul planı ilə tanış ola biləcəksiniz. Seçim “Magistr” 4 jurnalındakı siyahı əsasında aparılacaq. Bundan əlavə, hər bir bakalavr seçə biləcəyi ixtisaslaşmaların tam siyahısı ilə “Bakalavrın elektron ixtisaslaşma seçimi ərizəsi"ndə tanış ola biləcək.
Qeyd edək ki, bu il magistratura səviyyəsi üzrə ali təhsil müəssisələrinə qəbul olmaq üçün 17688 (o cümlədən 7022 yer dövlət sifarişli) plan yeri ayrılıb. Ötən illə müqayisədə bu il plan yerləri artıb və ümumilikdə 4.99% daha çoxdur. Bəzi proqramlar üzrə plan yerləri nisbətən artıb, bəziləri üzrə isə azalıb. Rus bölməsi üzrə plan yerləri azalsa da, rus və Azərbaycan bölməsi üzrə birgə müsabiqəyə təqdim olunan yerlərin sayı artıb. Belə ki, 2025-ci ildə birgə müsabiqə üzrə 4414 yer, 2026-cı ildə isə 15511 yer nəzərdə tutulub. Bu yerlərin əksəriyyəti üzrə tədris Azərbaycan dilində olacaq.
Qəbul proqramları üzrə plan yerləri (2025 və 2026-cı il) ilə buradan tanış ola bilərsiniz. Ali təhsil müəssisələri üzrə qəbul planı və ötən illə müqayisəsini isə buradan əldə edə bilərsiniz.
Bakalavrların nəzərinə çatdırırıq ki, DİM-in İdarə Heyətinin sədri Məleykə Abbaszadənin magistraturaya qəbul ilə bağlı daha geniş təhlil və tövsiyələrini müvafiq keçidlərə daxil olmaqla sədrin “Facebook” səhifəsi və “Whatsapp” kanalı vasitəsilə də əldə edə bilərsiniz.
Qeydlər:
Bakalavr bir neçə proqrama aid ixtisaslaşmaları seçə bilər, lakin seçilmiş bütün ixtisaslaşmaların ümumi sayı 20-dən artıq olmamalıdır.
56 №-li MBA (Biznesin idarə edilməsi) proqramına aid ixtisaslaşmaları imtahanda 45 bal toplamış və fənlər üzrə müsabiqə şərtlərini ödəyən bütün bakalavrlar seçə bilərlər.
Jurnalistika üzrə 44 saylı proqrama aid olan ixtisaslaşmaları cari ildə qəbul imtahanında 50 və daha çox bal toplamış və qabiliyyət imtahanından müvəffəqiyyətlə keçmiş bütün bakalavrlar seçə bilərlər.
42 №-li proqrama daxil olan Sosial iş ixtisasının “Gənclərlə iş” və “Həyat fəaliyyətinin müxtəlif sahələrində sosial iş” ixtisaslaşmalarını qəbul imtahanında 50 və daha çox bal toplamış bütün bakalavrlar seçə bilərlər.
42 №-li proqrama daxil olan Fəlsəfə ixtisasının “Təbiətşünaslıq fəlsəfəsi” ixtisaslaşmasını Təbiət ixtisasları qrupunu bitirən qəbul imtahanında 50 və daha çox bal toplamış bütün bakalavrlar seçə bilərlər.
42 №-li proqrama daxil olan Fəlsəfə ixtisasının “Fəlsəfə tarixi” və “Sosial fəlsəfə” ixtisaslaşmalarını Humanitar və sosial ixtisaslar qrupunu bitirən qəbul imtahanında 50 və daha çox bal toplamış bütün bakalavrlar seçə bilərlər.
Ali təhsil müəssisələrinin magistraturalarına qəbul olmaq üçün ixtisaslaşma seçimi növbəti həftə ərzində başlanacaq.
