Sumqayıt baxçasında örnək dərs: Körpələrə Vətən sevgisi aşılandı...
Sumqayıt şəhər 65 saylı körpələr evi-uşaq baxçasında keçirilən açıq dərs ictimaiyyət tərəfindən maraqla qarşılanıb.
Sumqayıt Dövlət Texniki Kollecinin son kurs tələbəsi Nuray Muradova körpələrlə birlikdə media nümayəndələri və ekspertlər qarşısında “Vətən” mövzusunda açıq dərs təqdim edib. Dərs zamanı azyaşlılara vətənə sevgi, milli dəyərlərə hörmət, bayraq və dövlət rəmzlərinə bağlılıq kimi mühüm anlayışlar sadə və anlaşıqlı formada aşılanıb.
Tədbirdə uşaqların fəallığı, mövzuya marağı və müəllimənin pedaqoji yanaşması iştirakçılar tərəfindən təqdirəlayiq hal kimi qiymətləndirilib. Xüsusilə erkən yaş dövründən milli-mənəvi dəyərlərin öyrədilməsi və uşaqlarda vətənpərvərlik ruhunun formalaşdırılması alqışlarla qarşılanıb.
Elm və Ali Təhsil üzrə Dövlət Agentliyinin direktoru Ülkər Səttarovanın vəzfiəyə təyin edilməsindən sonra kolleclərdə baş verən uğurlu fəaliyyətlər və belə keyfiyyətli işlərin ortaya çıxması qürurvericidir.
Məktəbəqədər təhsil müəssisələrində keçirilən açıq dərslər gənc mütəxəssislərin və tələbələrin peşəkar kimi yetişməsində əvəzsiz rol oynayır. Bu baxımdan Sumqayıt şəhər 65 nömrəli körpələr evi-uşaq bağçası gənc kadrlara göstərdiyi diqqət və qayğı ilə seçilən nümunəvi bağçalardan biridir.
Müəssisənin müdiri Günel Vidadi qızı Abbasovanın rəhbərliyi altında bağçada gənc tələbələrin praktiki biliklərə yiyələnməsi, özlərini rahat və yaradıcı mühitdə ifadə etmələri üçün hər növ şərait yaradılıb. Günel xanımın gənclərə olan fərdi diqqəti və mənəvi dəstəyi tələbələrdə öz peşələrinə qarşı böyük sevgi və məsuliyyət hissi oyadır.
Bağçada keçirilən növbəti açıq dərs zamanı tələbənin nümayiş etdirdiyi bacarıq və uşaqlarla qurduğu səmimi ünsiyyət xüsusilə diqqət çəkib. Bu fəaliyyətin uğurla baş tutmasında bağçanın təcrübəli tərbiyəçisi Səmayə Hacıyevanın da rolu böyükdür. Səmayə xanım öz zəngin təcrübəsini gənclərlə bölüşərək, onlara ilk addımlarında yol göstərir və peşəkar dəstəyini əsirgəmir.
"Gənclərə göstərilən bu qayğı və pedaqoji dəstək, gələcəkdə uşaqlarımızın daha savadlı və sevgi dolu müəllimlər tərəfindən tərbiyə olunacağına ən böyük zəmanətdir."
Sumqayıt şəhər 65 nömrəli körpələr evi-uşaq bağçasının rəhbərliyinə və kollektivinə gələcəyin tərbiyəçilərinə qanad gərdikləri, onlara həm müəllim, həm də arxa olduqları üçün təşəkkür edir, işlərində uğurlar arzulayırıq!
