Nazirin "DOSTU" -du deyə işçiləri təhdid etməlidi...?
Texnologiya Universitetinin rektoru Yaşar Ömərov son aylarda medianın və ictimaiyyətin diqqət mərkəzinə düşüb.
Elm və Təhsil naziri Emin Əmrullayevin yaxın çevrəsinə aid olduğu deyilən Yaşar Ömərovun fəaliyyəti ilə bağlı ortaya çıxan faktlar onun aqibətinin heç də yaxşı olmayacağından xəbər verir.
Məlumata görə, Yaşar Ömərovun fəaliyyəti zamanı yol verilmiş maliyyə pozuntuları aşkarlanaraq Gəncə Şəhər Prokurorluğuna göndərilib. Artıq bir neçə aydır ki, prokurorluq orqanlarında aparılan istintaq çərçivəsində korrupsiya faktlarının təsdiqini tapdığı bildirilir. Lakin bütün bunlara baxmayaraq, Texnologiya Universitetinin rektorunun davranışında hər hansı narahatlıq hiss olunmur.
İctimai rəyin formalaşmasında ciddi rezonans doğuran məqamlardan biri də Yaşar Ömərovun adı ilə bağlı yayılan audiosəs yazısı olub.
Sözügedən səs yazısından rektorun işçilərə qarşı təhdidedici münasibəti, idarəçilik bacarığının zəifliyi və vəzifə səlahiyyətlərindən sui-istifadə halları açıq şəkildə hiss olunur.
Həmin dövrdə bu səs yazısına hüquqi qiymət verilsəydi, Yaşar Ömərovun bu gün rektor postunda olması mümkün olmazdı.Buna baxmayaraq, rektor sanki toxunulmazlıq qazanıb. İddialara görə, bunun əsas səbəbi onun Elm və Təhsil naziri Emin Əmrullayevə yaxınlığıdır. Məhz bu yaxınlıq Yaşar Ömərova universitet daxilində “at oynatmaq”, “burada mənəm, Bağdadda kor xəlifə” prinsipi ilə hərəkət etmək imkanı yaradıb.
Ölkə başçısı dəfələrlə çıxışlarında məmur özbaşınalığına, vəzifə səlahiyyətlərindən sui-istifadə hallarına qarşı sərt mövqe nümayiş etdirib, vətəndaşları bu cür hallarla bağlı aidiyyəti qurumlara, Prezident Administrasiyasına müraciət etməyə çağırıb. Lakin ictimailəşmiş audiosəs yazısı və külli miqdarda maliyyə pozuntuları ilə gündəmə gəlmiş Texnologiya Universitetinin rektoru barədə nədənsə dövlət qurumlarının susqunluğu suallar doğurur.
Əslində, bu məsələlər barədə siqnal verməyə, məktub yazmağa belə ehtiyac yoxdur. Aidiyyəti dövlət orqanlarının Yaşar Ömərovun fəaliyyəti, maliyyə pozuntuları və səs yazısı haqqında məlumatlı olduğu hər kəsə bəllidir. Ancaq buna baxmayaraq, sanki heç nə baş verməyibmiş kimi davranılır.
Əgər Prezident tərəfindən təyin olunan vəzifəli şəxslər bir neçə il sonra maliyyə pozuntularına yol verirlərsə, bu, kadr siyasəti ilə bağlı ciddi suallar yaradır. Belə hallarda həmin şəxslərin əvvəlki fəaliyyətinin yetərincə araşdırılmadığı, hətta keçmişdə yol verdikləri qanun pozuntularına baxmayaraq yüksək vəzifələrə irəli çəkildikləri ehtimalı ortaya çıxır.
Bu proseslər bir daha göstərir ki, ölkədə həm ictimai, həm də dövlət nəzarəti mexanizmləri zəif işləyir. Təkcə ictimai nəzarət kifayət etmir, paralel olaraq ciddi və prinsipial dövlət nəzarəti də olmalıdır.
Nazirin dostu olduğu üçün rektor postuna gətirildiyi iddia edilən Yaşar Ömərova kim bu səlahiyyəti verib ki, işçiləri təhdid etsin, universitetdə maliyyə pozuntularına yol versin? Bu suallar hələ də cavabsız qalır.
