Bakıda üç ölkənin əbədi qardaşlığı vurğulandı
Bakıda Şimali Kipr Türk Respublikasına həsr olunmuş rəsm sərgisi keçirilib. 18 dekabr tarixində Azərbaycan Rəssamlar İttifaqında təşkil olunan sərgi Şimali Kipr Türk Respublikasının Azərbaycan Nümayəndəliyi, Yeni Azərbaycan Partiyası (YAP) Yasamal Rayon Təşkilatı və Beynəlxalq Qalereyanın birgə təşəbbüsü ilə baş tutub.
Modern.az xəbər verir ki, sərgidə Azərbaycan və Şimali Kiprə həsr edilmiş, müxtəlif yaş qruplarından olan peşəkar və həvəskar rəssamların əsərləri nümayiş olunub. Təqdim edilən işlər iki qardaş ölkənin təbiətini, mədəniyyətini və ortaq dəyərlərini sənət dili ilə əks etdirib.
Tədbirdə çıxış edən Şimali Kipr Türk Respublikasının Azərbaycan üzrə nümayəndəsi Ufuk Turqanər Azərbaycan ilə Şimali Kipr arasında mövcud olan sarsılmaz münasibətlərdən bəhs edib. O bildirib ki, bu əlaqələr dərin tarixi köklərə əsaslanan möhkəm qardaşlıq bağları üzərində qurulub. Ufuk Turqanər qeyd edib ki, sərgidə nümayiş olunan əsərlər bu qardaşlığın daha da möhkəmləndirilməsinə xidmət edir və hər biri yüksək sənət dəyərinə malikdir.
Milli Məclisin deputatı Cavanşir Feyziyev çıxışında azərbaycanlı sənətçilərin Şimali Kiprə xüsusi maraq göstərdiyini vurğulayıb. Onun sözlərinə görə, sənətçilər bu ölkəyə səfər edir, oradan aldıqları ilhamı öz yaradıcılıqlarında əks etdirirlər. Feyziyev əlavə edib ki, layihə ölkələr arasında mədəni əlaqələrin inkişafına töhfə verməklə yanaşı, Şimali Kiprin turizm potensialının tanıdılması baxımından da mühüm əhəmiyyət daşıyır. Növbəti mərhələdə sərginin Şimali Kiprdə keçirilməsi planlaşdırılır.
YAP Yasamal Rayon Təşkilatı sədrinin müavini Elnara Mustafayeva belə tədbirlərin mənəvi dəyərlərin təzahürü olduğunu qeyd edərək, bu cür sərgilərin Azərbaycan ilə Şimali Kipr Türk Respublikası arasında münasibətlərin daha da inkişafına töhfə verdiyini bildirib.
Azərbaycan Rəssamlar İttifaqının sədri, Xalq rəssamı Fərhad Xəlilov və digər çıxış edənlər də sərginin əhəmiyyəti barədə fikirlərini bölüşüblər.
Sonda qonaqlar sərgi ilə yaxından tanış olmaq imkanı əldə ediblər.
