Türkiyədə universiteti tərk edənlərin faizi rekord səviyyədə aşağı düşüb

Ali təhsil sistemlərinin davamlılıq göstəriciləri hər bir ölkənin təhsil strategiyasının effektivliyini göstərən vacib indikatorlardan biridir. Tələbələrin universiteti ilk il ərzində tərk etməsi, həm maddi, həm də sosial baxımdan təhsil sisteminə mənfi təsir göstərən hallardandır.

AzEdu.az türk mediasına istinadən xəbər verir ki, 2025-ci ildə Türkiyədə bakalavr proqramlarına qəbul olunan tələbələrin yalnız 1%-i universiteti ilk kursun sonunda tərk edib. Bu göstərici, inkişaf etmiş ölkələrin təhsil sistemlərini təhlil edən OECD-nin (İqtisadi Əməkdaşlıq və İnkişaf Təşkilatı) məlumatları ilə müqayisədə nəzərəçarpacaq dərəcədə aşağıdır.

Belə ki, OECD ölkələrində ortalama drop-out səviyyəsi təxminən 13% təşkil edir.Türkiyədə bu nisbətin aşağı olmasının səbəbləri arasında təhsil müəssisələrinin tələbə yönümlü idarəetməsi, psixoloji və akademik dəstək xidmətlərinin genişləndirilməsi, təqaüd imkanlarının artırılması və təhsilalanların təlim prosesinə daha çox cəlb olunması kimi amillər göstərilir.

Bundan əlavə, universitetlərdə fərdi mentorluq proqramları, sosial və karyera inkişafı üçün təşkil edilən layihələr də tələbələrin təhsildə davamlılığına müsbət təsir edir.

Təhsil ekspertləri bildirirlər ki, universiteti erkən tərk etmə faizi təkcə statistik göstərici deyil, həm də təhsilalanların sistemə olan inamını, ali təhsilin cəmiyyətə nə dərəcədə uyğun təşkil olunduğunu əks etdirir. Türkiyədə bu sahədə əldə edilən irəliləyiş, ölkənin təhsil siyasətinin nəticə yönümlü və tələbə mərkəzli olmasını göstərir.

Bu uğur, yalnız milli deyil, eyni zamanda beynəlxalq platformalarda da Türkiyənin ali təhsil sisteminə olan marağın və etibarın artmasına səbəb ola bilər.