Təhsili alimlər yox, kurs rəhbərləri idarə edəndə

ARTİ müəllimlər və Azərbaycan təhsili üçün alimlərin, professorların, yenilikçi mütəxəssislərin yeri olmalı idi. Amma Emin Əmrullayevin siyasəti nəticəsində ora faktiki olaraq kurs rəhbərlərinin “mərkəzinə” çevrildi. ARTİ-nin işçiləri, həmçinin adı rəsmi işçi kimi getməyən, amma qurumla dolayı yolla əlaqəsi olan kurs əməkdaşlarının sayı günü-gündən artır. Ortaya bir metodika — kurikulum — atdılar, amma işin əsl peşəkarları kənarda qaldı, onların yerinə təcrübəsi az olan şəxslər gətirildi.

Bir tərəfdən Elnur Əliyev, bir tərəfdən Aynur Rüstəmova və digərləri öz adamlarını ora yerləşdirdi. Hazırda ARTİ bəlkə də ən çox “at oynadılan” yerdir. Eyni zamanda Emin Əmrullayev üçün şəxsi qazanc mənbəyinə çevrilib. Pul silmə əməliyyatları məhz ARTİ-də baş verir. İşçilərə baxırsan — nə elmi dərəcə var, nə elmi nailiyyət. Amma kopyalama ilə özlərini “savadlı” kimi göstərməyə çalışırlar. Metodikanı həqiqətən bilən, illərini bu sahəyə vermiş müəllimləri isə sistemdən uzaqlaşdırırlar.

Müəllimlərin qiymətləndirilməsi, şagirdlərin qiymətləndirilməsi, müəllimlərin təkmilləşdirilməsi, milyonlarla vəsait ayrılan layihələr — hamısı yeyinti və pul silmə üçün istifadə olunur. Nəticə isə sıfırdır. Hələ üstəlik, elə bil vəzifəli şəxs imiş kimi, müxtəlif kurs adamlarını ARTİ-yə gətirib yüksək postlara yerləşdirirlər. Guya bunlar çox savadlı və peşəkar kadrlardır, amma əslində sadəcə ən yaxşı yaltaqlanan, ən yaxşı “pul silən” və kimə xidmət etdiyi bilinən şəxslərdir.

Vəzifəyə keçənlər də özündən sonra ARTİ-dəki “yaxınlarını” qaldırıb yerləşdirir, beləliklə, şəxsi dayaqlarını gücləndirirlər. Məqsəd yalnız daha çox vəsait ələ keçirməkdir. Gözləri doymayan, təhsillə əlaqəsi olmayan bu insanlar özlərini müəllimlər, şagirdlər və gənclər üçün çalışan “fədakar” kimi təqdim edir. Biabırçılığın həddi-hüdudu yoxdur. Maskalanmış, sürü psixologiyası ilə oynayan bu şəxslər indi sahiblərinin tapşırıqlarını yerinə yetirməkdən başqa heç nə etmir.