"Özəl məktəblərin sayı dövlət məktəblərini geridə qoyub"
"Hal-hazırda ölkəmizdə özəl məktəblərin sayı dövlət məktəblərini geridə qoyub. Həmçinin bu artım bərabərlik prinsipini pozur".
tehsilmedia.info xəbər verir ki, bunu təhsil eksperti Əli Ələkbərov deyib.
Onun sözlərinə görə, hazırda ölkəmizdə 4447 orta ümumtəhsil məktəbində 1,6 milyon şagird təhsil alır və onlara 150 min müəllim dərs deyir:
"Ən çox müəllim sıxlığı Bakıdakı orta ümumtəhsil məktəblərindədir. Bakıda 320 orta məktəb var. Burada 440 min şagird təhsil alır və 28 min müəllim çalışır. Bölgələrdə hər 12 şagirdə 1 müəllim düşürsə, Bakıda 9, bəzən 8 şagirdə 1 müəllim düşür. Dünyada da qəbul olunmuş norma da belədir. Amma biz etiraf edək ki, bu gün Azərbaycanın pedaqoji ali təhsil müəssisələrini kifayət qədər məzun bitirir və onların işlə təminatında ciddi problem var. Misal üçün, cari ildə aparılan imtahanlara da nəzər salanda görə bilərik ki, 60 min namizəd maksimum 8 min vakant yerə qəbul olunacaq, 50 mindən çox ali təhsilli şəxs işsiz olaraq qalacaq".
Ekspert problemin aradan qaldırılması üçün hesab edir ki, özəl gimnaziya və liseylərə daha geniş yer verilsin:
"Cəmi 50-yə yaxın özəl orta ümumtəhsil məktəbi fəaliyyət göstərir ki, bu da çox azdır. Bunlar da əsasən paytaxt Bakının payına düşür. Hesab edirəm ki, müəllim kontingentinin işlə təmin olunması və dövlətin yükünün azaldılması üçün özəl bağça və məktəblərin açılmasına geniş şərait yaradılmalıdır. Yalnız bu xarici ölkələrdə belə deyil. Təhsil sahəsində inkişaf etmiş ölkələrdə özəl məktəblərin sayı 50 %-i təşkil edir".
