Daha 5 məktəbdə fənn müəllimləri ilə metodik görüşlər keçirilib

Təhsil İnstitutunun Metodik Dəstək və Peşəkar İnkişaf Mərkəzi (MDPİM) tərəfindən Məktəbin İnkişaf Planının reallaşdırılması istiqamətində məktəblərə metodik xidmətin göstərilməsi prosesi davam etdirilir.

İnstitutdan "tehsilmedia.info"a bildirilib ki, bu məqsədlə mayın 8-dən 16-dək 18, 38, 51, 75 və 154 nömrəli tam orta məktəblərdə fənn müəllimləri ilə metodik görüşlər keçirilib. Məktəbin İnkişaf Planına əsasən təşkil edilən görüşlər müəllimlərin məktəbdaxili qiymətləndirməyə dair bilik və bacarıqlarının artırılmasına yönəlib.

Görüşlərdə müəllimlərlə summativ qiymətləndirmənin məqsədləri, üsul və vasitələri müzakirə olunub, sualların tərtibi zamanı diqqət olunmalı məqamlar, nəzəri məlumatlar əsasında praktiki tapşırıqlar yerinə yetirilib. Eyni zamanda, müəllimlərin hazırladıqları summativ qiymətləndirmə nümunələri də təhlil olunub.

Metodik görüşlər zamanı qrup işlərinin müzakirəsi aparılıb, fərdi şəkildə rəylər verilib və müvafiq suallar cavablandırılıb.

Qeyd edək ki, metodik görüşlərin tədris ilinin sonunadək keçirilməsi nəzərdə tutulur.