İmişli məktəbində ÖZBAŞINALIQ: Direktor təhsil müəssisəsində baş verən cinayəti polisdən gizlədib? - VİDEO

Bir çox sahələrdə olduğu kimi ölkənin təhsil sektorunda da məmur özbaşınalığı, vətəndaşların incidilməsi, rüşvət və korrupsiya faktları tüğyan edir. Mütəmadı olaraq bu cür faktlarla bağlı vətəndaşlar tərəfindən redaksiyamıza şikayət məktubları daxil olur. Bu şikayət məktublarından biri də İmişli rayon Qulubəyli kənd sakini Nağıyev Qalib Qaraseyid oğlu tərəfindən göndərilib. 

Təhsilmedia.az xəbər verir ki, vətəndaş İmişli rayon Qulubəyli kənd tam orta məktəbinin direktoru Mirsahib Tağıyev və onun qanunsuz əməllərini ört-basdır edən Mil-Muğan Regional Təhsil İdarəsinin müdiri Rəşad Musayevin əməlləri barədə danışıb. Qalib Nağıyevin iddiasına görə, direktor Mirsahib Tağıyev 7 illik direktor fəaliyyəti dövründə çoxsaylı qanunazidd əməllər törədib. Belə ki, 2021-ci ildə İmişli şəhər 1 saylı məktəbin boş qalan direktor vəzifəsinə diaqnostik qiymətləndirmədə iştirak edən Tağıyev heç bir bal toplaya bilməyib. Adi elementar sualları belə cavabsız qoyaraq müəllim adına ləkə gətirib. Eyni zamanda hazırda direktoru olduğu Qulubəyli kənd orta məktəbində şagirdlər arasında baş verən və xəsarətlə nəticələnən dava barədə hüquq mühafizə orqanlarına məlumat verməyib və məsələni ört-basdır etməyə çalışıb. Bütün bunlar azmış kimi direktor Mirsahib Tağıyev boş dərs saatlarını müəllimlərin işə qəbulu üzrə müsabiqəyə çıxarmayaraq müəllimlər arasında bölüşdürüb. Eyni zamanda rəhbərlik etdiyi təhsil müəssisəinə verilən inventar və materialların uçotunu aparmayıb. Qeyd edək ki, bütün bu məsələlər vətəndaş tərəfindən səsləndirilən iddiaların yalnız bir hissəsidir. 

Qulubəyli kənd sakininin sözlərinə görə, Mil-Muğan Regional Təhsil İdarəsinin müdiri Rəşad Musayev Mirsahib Tağıyevin bu cür qanunsuz əməllərinə göz yumur və ona sadəcə bir dəfə töhmət verməklə kifayətlənib. Halbuki, direktorun rəhbərlik etdiyi məktəbdə aparılan yoxlamalar nəticəsində aşkarlanan nöqsanlara görə, Mirsahib Tağıyev Əmək Məcəlləsinin 70-ci maddəsinin "ç" bəndinə uyğun olaraq işdən qovulmalı idi. Amma nə hikmətdirsə, Təhsil idarəsinin müdiri direktoru göz-bəbəyi kimi qoruyur. Belə olan təqdirdə isə onun qanunsuz əməllərinə haqq qazandırmış sayılır.  Ümid edirik ki, səsləndirilən iddialarla bağlı ən yüksək səviyyədə araşdırmalar aparılacaq və vətəndaşın sadaladığı məsələlər öz təsdiqini taparsa, məktəb direktoru, eləcə də ona havadarlıq edən Təhsil idarəsinin müdiri haqda ciddi ölçü götürüləcək.

P.S. Yazıda adı keçən tərəflərin mövqeyini dərc etməyə hazırıq!