Naxçıvanda eksternat qaydasında aralıq imtahanı keçirilib
Naxçıvan Muxtar Respublikası Təhsil Nazirliyi tərəfindən əvvəlki illərdə ümumi təhsil məktəblərini ümumi orta (IX) və tam orta (XI) təhsil səviyyəsi üzrə başa vura bilməyən şəxslər üçün eksternat qaydasında aralıq imtahanı keçirilib.
tehsilmedia.info xəbər verir ki, imtahan Naxçıvan şəhərində 16 nömrəli tam orta məktəbdə və muxtar respublikanın rayon mərkəzlərindəki tam orta məktəblərdə təşkil olunub.
İmtahanda 750-dən artıq müxtəlif səbəblərdən ümumi orta və tam orta təhsil səviyyələrini başa vura bilməyən şəxslər iştirak edib, onlara 6 fəndən suallar təqdim edilib və 1 saat vaxt ayrılıb.
Qeyd edək ki, eksternat təhsilalma formasının tətbiqi müxtəlif səbəblərdən ümumi orta və tam orta təhsil səviyyələrini başa vura bilməyən şəxslərə həmin səviyyələr üzrə buraxılış imtahanı verib müvafiq təhsil sənədi almaq üçün şərait yaratmaq məqsədi daşıyır. Eksternat imtahanlarında uğur qazanmış şəxslər ümumi orta və tam orta təhsil haqqında sənəd (attestat) almaq üçün Dövlət İmtahan Mərkəzi tərəfindən keçirilən buraxılış imtahanlarında iştirak etmək hüququna sahib olacaqlar.
