AMEA-nın Naxçıvan Bölməsinin Rəyasət Heyətinin iclası olub - FOTO
AMEA-nın Naxçıvan Bölməsinin Rəyasət Heyətinin iclası olub.
Bu barədə "tehsilmedia.info"a AMEA-dan məlumat verilib.
Naxçıvan Bölməsinin sədri, akademik İsmayıl Hacıyev iclası açaraq ilk növbədə iştirakçıları gündəlikdəki məsələlərlə tanış edib.
İsmayıl Hacıyev bildirib ki, aprel ayının 28-də görkəmli alim, tanınmış oftalmoloq, Əməkdar elm xadimi, AMEA-nın həqiqi üzvü Zərifə Əliyevanın anadan olmasının 100 ili tamam olur. Azərbaycan Respublikası Prezidentinin "Akademik Zərifə Əliyevanın 100 illik yubileyinin qeyd edilməsi haqqında” 3 noyabr 2022-ci il tarixli Sərəncamını diqqətə çatdıran bölmə sədri yüksək insani keyfiyyətlərə malik alimin tibb elminin inkişafına bəxş etdiyi töhfələrdən danışıb.
Daha sonra İncəsənət, Dil və Ədəbiyyat İnstitutunun Dilçilik şöbəsinin müdiri, filologiya üzrə fəlsəfə doktoru, dosent Nuray Əliyeva "Görkəmli oftalmoloq-alim, akademik Zərifə xanım Əliyevanın həyatı və fəaliyyəti” adlı məruzəsini təqdim edib.
"Zərifə xanım Əliyeva Azərbaycan elminin görkəmli nümayəndəsi, tibb tarixinə adını qızıl hərflərlə yazdırmış peşəkar həkim, qayğıkeş ana, sədaqətli həyat yoldaşı, nümunəvi pedaqoq, istedadlı natiq, sahib olduğu mənəvi keyfiyyətləri ilə əsl Azərbaycan xanımının real təcəssümü olmuşdur”, - söyləyən məruzəçi akademikin mənalı ömür yolu, tibb sahəsindəki uğurlu fəaliyyəti və elmi yaradıcılığı barədə müfəssəl məlumat verib.
Vurğulanıb ki, Zərifə xanım sadəliyi, nəcibliyi və səmimiyyəti ilə hər kəsin sevgisini qazanmış, həyatını, sözün əsl mənasında, xalqın işıqlı sabahına həsr etmişdir. İnsan sağlamlığının keşiyində dayanmağı özü üçün həyat amalı müəyyənləşdirən alimin həmin dövrdə ölkə əhalisi arasında geniş yayılmış traxoma xəstəliyinin müalicəsində, bu istiqamətdə profilaktik tədbirlərin təşkilində müstəsna xidmətləri olmuşdur. Bu xəstəlikdən xilas olmağın yeganə yolunu əsaslı tədqiqatların aparılmasında görən alim apardığı dəqiq və uğurlu araşdırmalar nəticəsində yeni müalicə metodu təklif edərək sözügedən xəstəliyin tamamilə müalicəsinə nail olmuşdur. Həyatı boyu amalına sadiq qalan Zərifə xanım elmi fəaliyyətini müvəffəqiyyətlə davam etdirmiş, 12 monoqrafiya, dərslik, dərs vəsaiti, 150-yə yaxın elmi məqalə, ixtira və səmərələşdirici təkliflərin müəllifi olmuşdur. O, SSRİ Tibb Elmlər Akademiyasının M.İ.Averbax mükafatına layiq görülmüş ilk qadın alimdir.
Məruzəçi bidirib ki, Zərifə Əliyeva öz sahəsi üzrə neçə-neçə həkim və alimin yetişməsinə, oftalmologiya elminin yeni kadr və biliklərlə zənginləşməsinə töhfələr vermişdir.
Zərifə xanımın Ulu Öndər Heydər Əliyevin vəfalı ömür-gün yoldaşı olduğunu xatırladan Nuray Əliyeva bildirib ki, o, bu məsuliyyətli vəzifəni qürur və bacarıqla daşımış, nümunəvi qadın, qayğıkeş ana kimi qəlbləri fəth etmişdir. Məruzəçi fikirlərini Ümummilli Lider Heydər Əliyevdən sitatlar gətirərək əsaslandırıb.
Məruzədən sonra iclasın gündəliyinə çıxarılan digər məsələlər müzakirə olunub, müvafiq qərarlar qəbul olunub.
