Yeni tədris ilində istifadə olunacaq dərsliklər muxtar respublikaya gətirilib

Naxçıvan Muxtar Respublikası Təhsil Nazirliyi tərəfindən 2023-2024-cü tədris ili üçün hazırlıqlara başlanılıb.

Nazirlikdən tehsilmedia.info-a verilən məlumata görə, həyata keçirilən tədbirlərdən biri də şagirdlərin dərsliklərlə vaxtında təminatıdır. Bunun üçün nazirlik tərəfindən ümumtəhsil məktəblərindəki dərsliklərin təhlili aparılıb, yeni dərsliklərə tələbat müəyyənləşdirilib, cari ilin aprel ayında 193 min 447 dərsliyin sifarişi verilib. Sifariş verilən dərsliklərdən 190 min 528-i artıq muxtar respublikaya gətirilib və növbəti günlərdə digər dərsliklərin də gətirilməsi təmin ediləcək.

Qeyd edək ki, bu tədris ilində ümumtəhsil məktəblərinin IV,VIII, XI sinifləri üçün nəzərdə tutulan bütün dərsliklər və VI sinif “Təbiət” dərsliyi yeni nəşrlərdir. Muxtar respublikanın ümumtəhsil məktəblərinin şagirdləri də yeni çap olunan dərsliklərlə təmin olunacaq. Hər biri mənəvi zənginlik, gələcəyin intellektli gənclərinin formalaşması üçün böyük bilik yükü daşıyan bu dərsliklər ilkin mərhələdə Naxçıvan Muxtar Respublikası Təhsil Nazirliyinə məxsus anbarlara toplanılır.

Dərsliklərin paylanması isə sentyabr ayının əvvəllərinədək həyata keçiriləcək. Dərsliklərin şagirdlərə əvvəlcədən paylanması tədris ili başlananadək onların bütün dərsliklərlə təmin edilməsinə və dərsliklərin məzmunu ilə tanış olmasına şərait yaradacaq. Vaxtında və pulsuz paylanan dərs vəsaitləri bu sahəyə olan dövlət qayğısının nəticəsidir.

Bu qayğı müqabilində məktəblilərin üzərinə düşən vəzifə biliklərə daha dərindən yiyələnmək və təqdim olunan vəsaitləri qoruyaraq onlardan düzgün istifadə etməkdir.