Milyonluq layihələr və "kamerasız bağça" ideyası: Bunlar nəyə xidmət edir?

Məktəbəqədər və Ümumi Təhsil üzrə Dövlət Agentliyinin (MÜTDA) direktor müavini Vəfa Yaqublunun bağçalarda kameraların quraşdırılması ilə bağlı səsləndirdiyi fikir cəmiyyətdə ciddi narazılıq və təəccüb doğurub. Agentlik rəsmisi bildirir:

"Bağçalarda kamera qoyulması lazımsızdır. Çünki uşaqlar bir-birinin saçını yolanda, vuranda valideynlər bunu görsə, müəllimə zəng edər, onu narahat edər. Valideynlər bilməlidir ki, uşaq belə mühitdə böyüməli və öyrənməlidir."

Cəmiyyətə təqdim olunan bu "pedaqoji yanaşma" haradan və hansı məntiqlə qidalanır? Təhsilə rəhbərlik edənlər cəmiyyəti və valideynləri nə hesab edirlər?

Əgər bağçalarda kamera quraşdırılması lazımsızdırsa, bəs dünya praktikasından və hətta ölkədəki özəl bağça təcrübəsindən niyə xəbərsizsiniz? Sirr deyil ki, bu gün fəaliyyət göstərən özəl bağçaların mütləq əksəriyyətində kameralar mövcuddur və valideynlər gün ərzində övladlarının təhlükəsizliyini canlı izləyə bilirlər.

Daha marqlı sual ortaya çıxır: Əgər kameralar pedaqoji baxımdan "yanlışdırsa", onda "Dövlət-Özəl Tərəfdaşlığı" adı altında milyonlarla manat dövlət vəsaiti niyə məhz bu şəraitə malik özəl bağçalara köçürülür? Bu, açıq-aşkar ziddiyyət və ikili standart deyilmi?

İnternetdən götürülmüş, Azərbaycan reallığına və milli təhsil mühitinə tamamilə yad olan qurama ideyaları "şəxsi təşəbbüs" kimi təqdim etmək təhsilə xidmət etmir. Yalnız süni islahat görüntüsü yaratmağa hesablanmış bu cür çıxışlar, əksinə, müəllim nüfuzuna və təhsil sisteminə olan inama ağır zərbə vurur.
Məntiqi ardıcıllıqdan uzaq, pedaqoji dəyərlərə sığmayan bu yanaşmalardan əl çəkilməli, cəmiyyətin və uşaqların təhlükəsizliyi naminə daha real, məsuliyyətli və şəffaf addımlar atılmalıdır.