Müəllim əməyinin növbəti bəhrəsi: 216 nömrəli məktəbin şagirdləri yüksək nailiyyətlər qazanıblar.
Hər bir fədakar pedaqoqun ən böyük mükafatı, illərini verdiyi peşənin ən gözəl bəhrəsi məhz yetişdirdiyi şagirdlərin uğurlarıdır. Bu uğurlar həm məktəbin, həm müəllimin, həm də bütövlükdə cəmiyyətimizin fəxridir.
Artıq 20 ildir ki, Ramiz Qasımov adına 216 nömrəli tam orta məktəbdə Azərbaycan dili və ədəbiyyatı müəllimi kimi fəaliyyət göstərən Röya Vəkilova bu tədris ilində də şagirdlərinin qazandığı böyük nailiyyətlərin sevincini yaşayır. Hər zaman şagirdlərinin uğurları ilə qürur duyan təcrübəli pedaqoqun yetirmələri builki respublika səviyyəli müsabiqələrdə və qəbul imtahanlarında yüksək nəticələr göstəriblər.
"Ən yaxşı təqdimat" müsabiqəsində respublika üçüncülüyü
Ümummilli lider Heydər Əliyevin anadan olmasının 103-cü ildönümünə həsr olunmuş respublika səviyyəli "Ən yaxşı təqdimat" müsabiqəsində məktəbin şagirdi Babazadə Zəhranur öz istedadı və hazırlığı ilə seçilərək ölkə üzrə 3-cü yerə layiq görülüb.
Şagirdin həm elmi rəhbəri, həm də ana dili və ədəbiyyat müəllimi olan Röya Vəkilova bu böyük nailiyyətin onlara sonsuz qürur bəxş etdiyini bildirib:
"Zəhranurun bu mötəbər müsabiqədə respublika dərəcəli yer qazanması həm onun istedadının, həm də bizim birgə əməyimizin gözəl nəticəsidir. Bir müəllim kimi bu uğur məni dərindən sevindirir."
Qəbul imtahanlarında yüksək göstəricilər
Məktəbin digər fəxr ediləsi uğurlarından biri də 11-ci sinif şagirdi Qulizadə Ayxan tərəfindən qazanılıb. Hələ 9-cu sinifdə fərqlənmə attestatına layiq görülən Ayxan, builki buraxılış və qəbul imtahanlarında da öz ənənəsinə sadiq qalaraq 602 bal toplayıb və yüksək intellektual potensialını növbəti dəfə sübut edib.
Bundan əlavə, 216 nömrəli tam orta məktəbin digər 11-ci sinif şagirdləri də bu tədris ilində öz bilik və bacarıqları ilə fərqlənib, yüksək ballar toplayaraq məktəbin adını ucaldıblar.
"Tehsilmedia.info" kollektivi olaraq başda Röya Vəkilova olmaqla, Ramiz Qasımov adına 216 nömrəli tam orta məktəbin rəhbərliyini, bütün pedaqoji heyətini və bu böyük uğurlara imza atan şagirdləri ürəkdən təbrik edir, onlara gələcək təhsil və karyera yollarında yeni-yeni zirvələr fəth etməyi arzulayırıq!
