34 mindən çox namizəd MİQ-də iştirak edəcək - Şöbə müdiri
2026-2027-ci tədris ili üçün dövlət ümumi təhsil müəssisələrinə müəllimlərin işə qəbulu (MİQ) müsabiqəsinin test imtahanı mərhələsinə start verilib.
AzEdu.az xəbər verir ki, bunu jurnalistlərə açıqlamasında Məktəbəqədər və Ümumi Təhsil üzrə Dövlət Agentliyinin İmtahan və Qiymətləndirmə şöbəsinin müdiri Nurlan İsmayılbəyli deyib.
O bildirib ki, test imtahanları növbəti dörd gün ərzində keçiriləcək və iyulun 18-də yekunlaşacaq.
Nurlan İsmayılbəylinin sözlərinə görə, müsabiqə tam elektron formada təşkil olunur. Ölkənin 23 müxtəlif şəhərində eyni vaxtda 11 mindən çox namizədin imtahan verməsi üçün zəruri infrastruktur yaradılıb. İmtahanlar hər gün iki seans olmaqla keçiriləcək və gün ərzində 6-8 min namizədin iştirakı nəzərdə tutulur.
Şöbə müdiri qeyd edib ki, imtahanların ilk günündə informatika və ibtidai sinif müəllimliyi üzrə namizədlər test mərhələsində iştirak edirlər. Növbəti günlərdə isə digər fənlər üzrə imtahanlar təşkil olunacaq.
N. İsmayılbəyli xatırladıb ki, Nazirlər Kabinetinin müvafiq qərarına əsasən, bu ildən etibarən MİQ müsabiqəsinin test imtahanı mərhələsi ödənişli əsaslarla keçirilir. Bununla belə, şəhid ailəsi üzvləri, müharibə veteranları, ünvanlı dövlət sosial yardımı alan ailələrin üzvləri, əlilliyi olan şəxslər və müsabiqədə ilk dəfə iştirak edən namizədlər ödənişdən azaddırlar.
Onun sözlərinə görə, müsabiqədə ümumilikdə 34 mindən artıq namizədin iştirakı gözlənilir. Onlardan təxminən 10 min nəfəri ödənişdən azad olunan kateqoriyaya daxildir. Qalan 24 min namizəd isə 6-9 iyul tarixlərində ödənişi tamamlayaraq miq.edu.az portalı vasitəsilə buraxılış vərəqələrini əldə edib.
Şöbə müdiri əlavə edib ki, namizədlər elektron ərizələrində göstərdikləri faktiki yaşayış ünvanlarına uyğun olaraq onlara ən yaxın imtahan mərkəzlərinə yerləşdiriliblər. İmtahanın keçiriləcəyi ünvan, tarix və saat barədə məlumatlar ötən həftə ərzində namizədlərə göndərilib.
Nurlan İsmayılbəyli bildirib ki, Agentliyə daxil olan müraciətlər əsasında 100-dən çox namizədin imtahan mərkəzinin dəyişdirilməsi ilə bağlı müraciəti müsbət qiymətləndirilib və həmin şəxslərə yeni imtahan dəvətnamələri təqdim olunub.
