"Müəllimlərimizin bir qismi kompüterdən belə istifadə edə bilmir" - AÇIQLAMA
“Süni intellektin təhsilverənlərə təlimi nəticədə böyük bir nəslin süni intellektlə yaxından tanış olmasına səbəb ola bilər. Çünki müəllimlər süni intellekti bildikləri zaman onu öz dərslərinə inteqrasiya edəcəklər və dərslərdə istifadə olunan süni intellekt artıq şagirdlər üçün bir vərdişə çevriləcək. Amma müəllimlərimizin bir qismi kompüter texnologiyalarından istifadə bacarıqlarına malik deyil”.
Bu fikirləri Redaktor.az-a açıqlamasında təhsil müəssisələrində süni intellektdən istifadədən danışan təhsil eksperti Qoşqar Məhərrəmov dedi.
O vurğuladı ki, bəzi müəllimlər fundamental səviyyədə kompüterdən istifadə etmək, axtarış sistemlərindən yararlanmaq bacarığına və səriştəsinə malik deyillər:
“Ona görə də onlara süni intellekti də təlim edə bilməyəcəyik. Mənim təklifim odur ki, universitet səviyyəsində, pedaqoji fakültələrdə təhsil alan tələbələr üçün "Təhsildə süni intellektin istifadə olunması" fənni tədris edilsin, bunun proqramı hazırlansın və universitetlərin bütün pedaqoji fakültələrində səriştəli professor-müəllim heyəti gələcəyin müəllimlərinə belə bir fənni tədris etsin.
Yəni söhbət təhsildə İKT və təhsildə texnologiyalardan gedir. Bu fənn universitetlərin bir qismində mövcuddur. Amma həmin fənnin tədrisində yenə də daha çox kompüterdən istifadə və buna bənzər məsələlər öyrədilir. Mənim təklifim isə sırf süni intellektin, eyni zamanda onunla yanaşı müxtəlif digər texnologiyaların da öyrədildiyi bir fənnin tədris olunmasıdır.
Əgər biz bu fənni pedaqoji fakültələrin tələbələrinə yaxşı öyrədə bilsək, o zaman həqiqətən də görəcəyik ki, onlar gələcəkdə öz şagirdlərinə süni intellekti öz fənləri çərçivəsində istifadə etməyi öyrədə bilərlər. Süni intellekt elə bir sahə deyil ki, şagirdlərə ayrıca bir fənn kimi tədris olunsun. Şagirdlərə bəlkə də kompüter dərslərində həmin süni intellekt alətləri öyrədilə bilər. Deməli, gələcəyin kompüter müəllimləri süni intellekti yaxşı bilməlidirlər ki, onu öz kompüter və informatika dərslərində orta məktəb şagirdlərinə öyrədə bilsinlər".
Lakin onun fikrincə, digər müəllimlər də öz fənlərində süni intellektdən istifadə etməlidirlər.
"Bunu etsələr, çox yaxşı olar. Bu, böyük bir üstünlükdür. Ona görə də gələcəyin müəllimlərinə biz bu alətləri öyrətməliyik.
Bəs bu fənni universitetlərdə kimlər tədris edə bilər? Mən hesab edirəm ki, bu fənni universitetlərdə xaricdə təhsil texnologiyaları sahəsində magistratura təhsili almış, ən azı magistr dərəcəsinə malik şəxslər tədris edə bilərlər. Hazırkı universitetlərimizin pedaqoji fakültələrində çalışan professor-müəllim heyətinin belə bir fənni tədris etmək qabiliyyətinə malik olduğunu düşünmürəm. Əksəriyyəti, ehtimal ki, bunu tədris edə bilməyəcək.
Amma hazırda dünyada xaricdə təhsil proqramları vasitəsilə magistratura təhsili alan insanlar var ki, onların bir qismi məhz təhsil texnologiyaları sahəsində təhsil alır. Həmin insanlar ölkəyə qayıdıb universitetlərdə işlədikləri zaman bu fənni bakalavr tələbələrinə rahatlıqla tədris edə bilərlər”, - deyə Q.Məhərrəmov əlavə etdi.
