Bratislavada Azərbaycan çempionu ilə sinxron şahmat turniri təşkil olunub
Vyanadakı Azərbaycan Mədəniyyət Mərkəzi və ölkəmizin Slovakiyadakı səfirliyi, Bratislava Şahmat İttifaqı və Slovakiya Şahmat Federasiyasının Qadınlar üzrə Komissiyası ilə əməkdaşlıq çərçivəsində aprelin 19-da Bratislavada qadınlar arasında şahmat üzrə Azərbaycan çempionu, beynəlxalq usta Ülviyya Fətəliyeva ilə şahmatçılar üçün sinxron turnir təşkil edib.
AZƏRTAC xəbər verir ki, Azərbaycanın Bratislavadakı səfirliyində keçirilən sinxron turnirdə Ü.Fətəliyeva eyni vaxtda 15 iştirakçıya qarşı mübarizə aparıb.
Turnirdən öncə çıxış edən Azərbaycanın Slovakiyadakı səfiri Vüsal Abdullayev bu kimi maraqlı təşəbbüslərin iki ölkə arasında əlaqələrin inkişafına töhfə verdiyini vurğulayıb və yarış iştirakçılarına uğurlar arzulayıb.
Azərbaycan Mədəniyyət Mərkəzinin rəhbəri Leyla Qasımova azərbaycanlı şahmatçıların Vyanaya dəvət edilməsinin artıq ənənə hal aldığını və ilk dəfə belə bir sinxron turnirin Slovakiyada da təşkilindən məmnunluq ifadə edib, bu kimi layihələrin sərhədləri aşaraq insanları bir araya gətirdiyini bildirib.
Slovakiyanın Şahmat Federasıyasının Qadınlar üzrə Şahmat Komissiyasının sədri Andrea Bohniçkova və Bratislava Şahmat İttifaqının sədr müavini Stanislav Vlçek yüksək reytinqli beynəlxalq ustanın Bratislavaya gəlişinin yerli şahmatçılar üçün müstəsna əhəmiyyətə malik olduğunu və bununla əlaqədar bu şahmat turnirinin təşkilinə görə Azərbaycan Mədəniyyət Mərkəzinin rəhbəri Leyla Qasımovaya, ölkəmizin Slovakiyadakı səfiri Vüsal Abdullayevə və Ülviyyə Fətəliyevaya minnətdarlığını ifadə ediblər.
Beynəlxalq usta Ülviyyə Fətəliyeva Bratislavada slovakiyalı şahmatçılarla görüşdən məmnun olduğunu və turnirin keçirilməsi üçün yaradılmış şəraitə görə minnətdarılığını bildirib.
Yerli şahmatçıların yüksək reytinqli şahmatçıya qarşı oynamaqla öz təcrübəsini artırmağa xidmət edən turnir maraqlı mübarizə şəraitində keçib.
2026-cı ildə qadınlar arasında şahmat üzrə ölkə çempionu titulunu qazanan beynəlxalq usta Ülviyyə Fətəliyeva 1996-cıildə Gəncə şəhərində anadan olub. Qeyd etmək lazımdır ki, o, 2024-cü ildə Yunanıstanın Rodos şəhərində keçirilən qadınlar arasında şəxsi Avropa çempionatının qalibidir. Bu ilin mart ayında 8 ölkədən 10 şahmatçının qatıldığı turnirdə 9 turda 6,5 xal toplayaraq "IV Women's Chess Championship"in qalibi olub. Ü.Fətəliyeva FİDE-nin aktual reytinq sıralamasında 2450 xal ilə dünya üzrə 33-cü sırada qərarlaşıb
