“Müasir din təhsili modelləri ənənələr və qlobal çağırışlar kontekstində” - beynəlxalq simpozium

Dini Qurumlarla İş üzrə Dövlət Komitəsinin tabeliyində fəaliyyət göstərən Azərbaycan İlahiyyat İnstitutunun və Mənəvi Dəyərlərin Təbliği Fondunun birgə təşkilatçılığı ilə oktyabrın 22-23-də “Müasir din təhsili modelləri ənənələr və qlobal çağırışlar kontekstində” mövzusunda beynəlxalq simpozium keçiriləcək.

İlahiyyat İnstitutundan TƏHSİL.BİZ -ə bildirilib ki, simpoziumun məqsədi Azərbaycanda və dünyada din təhsili sahəsində mövcud vəziyyətin müzakirəsi, qarşıya çıxan problemlərin təhlili, onların həlli ilə bağlı təkliflərin irəli sürülməsinin təmin edilməsi, bu istiqamətdə fəaliyyət göstərən alim və mütəxəssislər arasında tədqiqat işləri, məlumat və təcrübə mübadiləsi üçün platforma yaradılmasıdır.

Simpozium “Din təhsili: tarix, ənənə və müasirlik”, “Dünyəvi dövlətdə din təhsili”, “Din təhsili, tolerantlıq və multikulturalizm”, “Din təhsili və əxlaqi dəyərlər”, “Din təhsili modelləri”, “Postsovet məkanında din təhsili problemləri və perspektivlər”, “Azərbaycanda dövlət-din münasibətlərinin tənzimlənməsində Ulu Öndər Heydər Əliyevin rolu”, “Prezident İlham Əliyev və Azərbaycanda din təhsili”, “Dini savadsızlığın yaranma səbəbləri, doğurduğu fəsadlar (dini fanatizm, xurafat, radikalizm, ekstremizm) və onlarla mübarizə üsulları”, “Ənənəvi və yeni mediada din təhsili”, “Süni intellekt və din təhsili” və digər mövzuları əhatə edəcək.Simpoziuma tezislər və məqalələr Azərbaycan, türk, ingilis, rus və ya ərəb dillərində qəbul olunur. Müəlliflər tezisləri və ya məqalələri göndərmək üçün https://symposium.ait.edu.az/ saytında qeydiyyatdan keçib şəxsi kabinet yaratmalıdırlar. Tezislər və məqalələr yalnız sayt üzərindən qəbul edilir. Daxil olan tezislərin və məqalələrin dəyərləndirilməsi zamanı ikitərəfli anonim rəy prosesi tətbiq olunur.

Tezisləri mayın 26-dək göndərmək, məqalələri avqustun 29-dək təqdim etmək olar.

Konfrans haqqında ətraflı məlumat Azərbaycan İlahiyyat İnstitutunun saytında yerləşdirilib.