Şərqşünaslıq İnstitutunda elmi sessiya: “Şərq qadınları elmdə”
Fevralın 8-də AMEA-nın akademik Ziya Bünyadov adına Şərqşünaslıq İnstitutunda “Şərq qadınları elmdə” mövzusunda elmi sessiya keçirilib.
Bu barədə institutdan məlumat verilib. Bildirilib ki, tədbirdə çıxış edən Şərqşünaslıq İnstitutunun direktoru akademik Gövhər Baxşəliyeva müasir dövrdə qadınların ictimai həyatda, elmdə mühüm yer tutduqlarını söyləyib. G.Baxşəliyeva BMT Baş Assambleyasının 2015-ci il dekabrın 22-də qəbul etdiyi qətnaməyə əsasən fevralın 11-nin “Qadınlar və qızlar elmdə” Beynəlxalq Günü elan edildiyini bildirib. Azərbaycan qadınlarının ictimai həyatda və elmdə tutduqları mövqedən bəhs edib.
Şərqşünaslıq İnstitutunun Qadınlar təşkilatının sədri Xanımzər Kərimova şərqşünas alimlərin elmdə əldə etdikləri uğurlardan danışıb.
İran filologiyası şöbəsinin aparıcı elmi işçisi dosent Səadət Şıxıyeva “Azərbaycan, Türkiyə və Özbəkistan saraylarında qadın şairlərin ədəbi fəaliyyəti” mövzusunda məruzə edib. O bildirib ki, XIX əsrdə Azərbaycan, Türkiyə və Özbəkistan ədəbi dairələrində əvvəlki əsrlərlə müqayisədə qadın şairlərin sayında artım müşahidə olunub. Hər üç ədəbi çevrənin inkişafında dövrün saraylarındakı mühit mühüm rol oynayıb. Həmin saraylarda yetişən əsilzadə şair xanımlardan bəziləri ədəbi fikrə yeni istiqamət veriblər. Onlardan bəziləri xan (Nadirə xanım – Özbəkistan), xan qızı (Natəvan – Azərbaycan) və ya sultan (Adilə Sultan – Türkiyə) statusu ilə cəmiyyətdə yüksək mövqe sahibi olublar, bu yüksək məqamdan istifadə edərək, öz çevrələrindəki şair qadınları himayə ediblər.
Vurğulanıb ki, XIX əsrdə əsilzadə qadınlar və onların yaxın çevrəsi ədəbi mühitin mərkəzi simalarına çevrilib, poeziya tarixində yeni səhifələr açılmasına töhfə veriblər. Xüsusilə Natəvan və Nadirə xanım dövrün ədəbi fikrinin inkişafına şərait yaradıblar.
Elmi sessiyada “Ulu Öndər Heydər Əliyevin alim qadınlara verdiyi dəyər”, “Qadın şərqşünas alimlərimiz” və “Türk tarixi romanlarında qadın obrazları” mövzularında məruzələr dinlənilib.
AMEA Ədəbiyyat İnstitutunun Qadınlar təşkilatının İdarə Heyətinin üzvü Esmira Şükürova elmi sessiyada səsləndirilən məruzələrlə bağlı fikirlərini bölüşüb və Şərqşünaslıq İnstitutunun qadın alimlərinin fəaliyyətini yüksək dəyərləndirib.
