21 dövlət orqanına daxili müsahibə elanı verilib
14 noyabr 2023-cü il tarixindən 21 dövlət orqanında inzibati vəzifələrin 3-7-ci təsnifatına uyğun olan vəzifələrin tutulması məqsədilə daxili müsahibə elanı verilib.
Dövlət İmtahan Mərkəzindən (DİM) tehsilmedia.info - a bildirilib ki, daxili müsahibədə iştirak etmək istəyən namizədlər 14 noyabr 2023-cü il tarixindən 28 noyabr 2023-cü il saat 18:00-dək qeydiyyatdan keçməlidirlər
Ümumilikdə Əmək və Əhalinin Sosial Müdafiəsi Nazirliyində 26, Gənclər və İdman Nazirliyində 14, Ekologiya və Təbii Sərvətlər Nazirliyində 11, Vətəndaşlara Xidmət və Sosial İnnovasiyalar üzrə Dövlət Agentliyində 7, Mədəniyyət Nazirliyində 5, Rəqəmsal İnkişaf və Nəqliyyat Nazirliyində 4 , Maliyyə Nazirliyində 4, Dövlət Şəhərsalma və Arxitektura Komitəsində 3, Hesablama Palatasında 2, Naxçıvan Muxtar Respublikasının Statistika Komitəsində 2, Naxçıvan Muxtar Respublikasının Ali Məhkəməsində 2, Kənd Təsərrüfatı Nazirliyində 1, Energetika Nazirliyində 1, Qaçqınların və Məcburi Köçkünlərin İşləri üzrə Dövlət Komitəsində 1, Qida Təhlükəsizliyi Agentliyində 1, Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Xidmətində 1, Naxçıvan Muxtar Respublikasının Dövlət Şəhərsalma və Arxitektura Komitəsində 1, Sumqayıt Apellyasiya Məhkəməsində 1, Sumqayıt İnzibati Məhkəməsində 1, Bakı Şəhəri Sabunçu Rayon Məhkəməsində 1 və Abşeron Rayon Məhkəməsində 1 vakant vəzifə daxili müsahibə elanına çıxarılıb.
Daxili müsahibəyə çıxarılan vəzifələr arasında ən yüksək vəzifə inzibati vəzifələrin 3-cü təsnifatına uyğun olan Azərbaycan Respublikasının Rəqəmsal İnkişaf və Nəqliyyat Nazirliyi yanında Dövlət Mülki Aviasiya Agentliyinin direktorunun müavini vəzifəsidir.
Qanunvericiliyin tələblərinə uyğun olaraq, daxili müsahibə üzrə sənəd qəbulu elektron qaydada həyata keçirilir. Daxili müsahibə üzrə sənəd qəbulunun elektron qaydada həyata keçirilməsi vətəndaşların rahatlığının təmin edilməsi, vaxt itkisinin və maliyyə xərclərinin qarşısının alınması, habelə Mərkəz tərəfindən göstərilən dövlət xidmətlərinin daha əlçatan olmasına imkan verir.
Daxili müsahibədə aşağıdakı şəxslər iştirak hüququna malikdir:
Vakant vəzifəni təqdim etmiş dövlət orqanında inzibati vəzifələrdə qulluq keçən və inzibati vəzifələrin təsnifatına uyğun ixtisas dərəcəsi olan dövlət qulluqçuları;
Dövlət orqanının ləğvi, dövlət qulluqçularının sayının və ya ştatlarının ixtisarı ilə əlaqədar daxili müsahibə elan edilən dövlət orqanında ehtiyat kadr kimi saxlanılan şəxslər;
1-3-cü kateqoriya dövlət orqanlarında inzibati vəzifələrin 1-3-cü təsnifatlarına uyğun olan vəzifələrə, habelə mərkəzi icra hakimiyyəti orqanlarında, onlara bərabər tutulan orqanlarda (Azərbaycan Respublikasının Prezidenti yanında Ali Attestasiya Komissiyası, Azərbaycan Respublikasının Prezidenti yanında Dövlət Sirrinin Mühafizəsi üzrə İdarələrarası Komissiyanın Katibliyi) şöbə müdiri, rəhbərin müşaviri və rəhbərin köməkçisi vəzifələrinə iddia edən şəxslər.
Daxili müsahibədə iştirak etmək istəyən namizədlər 14 noyabr 2023-cü il tarixindən 28 noyabr 2023-cü il saat 18:00-dək Mərkəzin internet portalında “Dövlət qulluğu üzrə müraciət Forması”nı doldurmaqla qeydiyyatdan keçməlidirlər.
