DİM jurnalistləri mükafatlandırıb
Dövlət İmtahan Mərkəzində 22 iyul Milli Mətbuat Günü münasibətilə “Bunker müəllimi: illüziya və reallıq” mövzusunda kütləvi informasiya vasitələrinin təmsilçiləri arasında elan olunan müsabiqənin qalibləri mükafatlandırılıb.
tehsilmedia.info xəbər verir ki, tədbirdə Dövlət İmtahan Mərkəzinin Direktorlar Şurasının sədri Məleykə Abbaszadə çıxış edərək jurnalistləri 22 iyul Milli Mətbuat Günü münasibətilə təbrik edib. Sədr ölkə ictimaiyyətinin böyük maraq göstərdiyi ali və orta ixtisas təhsili müəssisələrinə tələbə qəbulu prosesinin, bu sahədə həyata keçirilən tədbirlərin, yeniliklərin KİV nümayəndələri tərəfindən diqqətdə saxlanılmasını, bu istiqamətdə maarifləndirmə işinin aparılmasını yüksək qiymətləndirib, DİM ilə media işçiləri arasındakı səmərəli əməkdaşlığın bundan sonra da davam edəcəyinə əminliyini ifadə edib.
Qeyd olunub ki, müsabiqədə iştirak etmək üçün sənəd qəbulu 27 mart – 30 iyun 2023-cü il tarixlərində aparılıb və bu müddət ərzində 3 videoreportaj və 13 yazı olmaqla, ümumilikdə 16 material Mərkəzə təqdim olunub.
Müsabiqə elan olunan zaman mükafatlandırma qaydasına görə I və II yer üzrə bir nəfər, III yer üzrə isə üç nəfərin qalib elan olması nəzərdə tutulsa da, müsabiqənin gedişində bir neçə videoreportajın təqdim olunması və onların yazı materialları ilə müqayisədə təbii üstünlüyü nəzərə alınaraq hər iki sahəyə aid materialların ayrıca (I, II, III yerlərin hər biri üzrə bir nəfər qalib olmaqla) mükafatlandırılması qərara alınıb. Beləliklə, nəticədə ümumilikdə 5 əvəzinə 6 nəfər qalib elan olunub.
Müsabiqəyə təqdim olunmuş materiallar Dövlət İmtahan Mərkəzinin rəhbərliyi və müvafiq struktur bölmələrinin müdirləri tərəfindən qiymətləndirilib.
Qiymətləndirmənin nəticələrinə əsasən, videomateriallar arasında
Real TV-nin əməkdaşı Əliyeva Könül 1-ci;
İctimai TV-nin əməkdaşı Fərəməzova Elmira 2-ci;
Aztv-nin əməkdaşı Əsədova Nigarın reportajı isə 3-cü yeri tutub.
Yazı materialları arasında isə
APA-nın müxbiri Nihat Piriyevin yazısı 1-ci;
Report-un müxbiri Samirə Abdullayevanın yazısı 2-ci;
"Azərbaycan məktəbi" jurnalının əməkdaşının yazısı isə 3-cü yeri tutub.
Daha sonra Məleykə Abbaszadə qaliblərə hədiyyə və nəzərdə tutulan pul mükafatını (I yer üçün 1000 manat, II yer üçün 800 manat, III yer üçün 500 manat) təqdim edib.
