"Son zəng" kriminal mahnılarla yadda qaldı

Son zəngdə şagirdlərin səsləndirdikləri musiqi və oynadıqları mahnılar sosial şəbəkədə müzakirə mövzularından birinə çevrilib. Son zəngdə kriminal aləmə aid mahnıların səslənməsi və onların bu tip mahnılara oynaması narazılıqla qarşılanıb.

Məktəblilərin bu tip mahnılara marağı hardan və necə yaranıb?
Niyə belə mahnılara daha çox maraq göstərilir?

Təəssüf doğuran digər məsələ isə bu rəqslərin valideynlər və müəllimlər tərəfindən alqışlanmasıdır.
tehsilmedia.info xəbər verir ki, bu məsələ Milli Məclisdə də müzakirəyə çıxarılıb. Bəzi millət vəkilləri hesab edir ki, bununla bağlı konkret tədbirlər görülməlidir.
Deputat Naqif Həmzəyev bildirib ki, Təhsil Nazirliyində olan şəxslər hara baxır? Onun sözlərinə görə, valideynlər və müəllimlər kriminal aləmə olan bu marağın qarşısını almaq üçün maarifləndirmə tədbirləri həyata keçirməlidir.
Deputat Elşən Musayev isə tam əksi fikirdədir. Son zəngdə çalınan mahnılar Təhsil Nazirliyinin predmeti deyil, İnsanların zövq anlayışıdır. Naqif Həmzəyev isə bu fikirlə razı deyil. Bu məsələdə məktəb rəhbərliyi də məsuliyyət daşıyır. Orta məktəblərdə ideoloji iş yüksək səviyyədə aparılmalıdır. Bu uşaqların nəzarətsiz qalması onlarda pis vərdişlərə meyilliyin artmasına səbəb olub.
Spiker Sahibə Qafarova isə bu məsələ ilə bağlı faktların toplanıb Təhsil Nazirliyinə təqdim edilməsini tövsiyyə edib. Sosioloqlar hesab edir ki, yuxarı sinif şagirdlərinə həssas yanaşmalı və onlarla ayrıca söhbətlər aparılmalıdır. Bu məsələdə valideyn və müəllimlər səylərini birləşdirməlidir. Belə hadisələrin baş verdiyi məktəblərdə monitorinqlər keçirilməlidir.
Qeyd edək ki, 14 iyunda bütün ümumtəhsil müəssisələrində son zəng tədbirləri keçirilib.