IDSchool tələbələri beynəlxalq robotika və innovasiya yarışlarında uğurlar qazanıblar - FOTO
IDSchool tələbələri beynəlxalq robotika və innovasiya yarışlarında uğurlar qazanıblar.
IDSchool tələbələri 2026-cı il ərzində keçirilən müxtəlif robotika, proqramlaşdırma, innovasiya və texnologiya yarışlarında uğurlu nəticələr əldə ediblər. Tələbələrin hazırladığı layihələr həm yerli, həm də beynəlxalq müsabiqələrdə yüksək qiymətləndirilib, komandalarımız müxtəlif kateqoriyalar üzrə qalibiyyətlər və münsiflər heyətinin xüsusi mükafatlarına layiq görülüblər.
İlin ilk mühüm nəticələrindən biri 8–9 mart tarixlərində keçirilən Fibonacci Beynəlxalq Olimpiya Oyunlarında əldə olunub. Yarışda IDSchool-u təmsil edən 7 komandadan 6-sı müxtəlif kateqoriyalar üzrə mükafat qazanıb.
Food Ninjas komandası Smart Food Guardian layihəsi ilə Green Entrepreneurship kateqoriyasında 1-ci yerə layiq görülüb. Layihə qida təhlükəsizliyi və ekoloji yanaşmaları texnologiya ilə birləşdirən həll kimi təqdim olunub.
Maze Runner komandası Maze Solving kateqoriyasında 2-ci yeri tutub.
Eco Princess komandası Smart Bee Bus Station layihəsi ilə Green Entrepreneurship kateqoriyasında 3-cü yerə, Tech Kings komandası isə Smart Bed Monitoring System layihəsi ilə Health Tech Entrepreneurship kateqoriyasında 3-cü yerə layiq görülüb.
Bununla yanaşı, SudoSense komandası SudoSense layihəsi ilə Soft Tech Entrepreneurship kateqoriyasında, Path Finders komandası isə Line Following kateqoriyasında Jury Award mükafatını qazanıb.
Aprel ayında komandalarımız beynəlxalq uğurlarını davam etdiriblər. 22–26 aprel tarixlərində Türkiyənin Antalya şəhərində keçirilən Fibonacci Avrasiya Robot Olimpiadasında Food Ninjas komandası Smart Food Guardian layihəsi ilə Green Entrepreneurship kateqoriyasında 1-ci yerə layiq görülüb.
Eyni yarışda Eco Princess komandası Smart Bee Bus Station layihəsi ilə, Tech Kings komandası isə Smart Bed Monitoring System layihəsi ilə Jury Award mükafatına layiq görülüb.
Əldə olunan nəticələr komandalar üçün yeni beynəlxalq imkanlar da yaradıb. Qeyd olunan uğurlar çərçivəsində komandalarımızdan biri 3 noyabr–4 dekabr tarixlərində Romada keçiriləcək proqramda iştirak edəcək.
IDSchool tələbələri yalnız robotika yarışlarında deyil, innovasiya və proqramlaşdırma yönümlü müsabiqələrdə də fərqləniblər. 14 mart tarixində Avropa Azərbaycan Məktəbində keçirilən EAS Hackathon 2026 yarışında tələbələrimiz 1-ci yerə layiq görülüblər. Hackathon çərçivəsində iştirakçılar qısa müddət ərzində texnoloji həllər hazırlayaraq öz proqramlaşdırma, problem həll etmə və komanda ilə işləmə bacarıqlarını nümayiş etdiriblər.
19–21 iyun tarixlərində keçirilən AİRO 2026 Beynəlxalq Robot Olimpiadasında da IDSchool komandaları uğurlu nəticələr əldə edib. ID Spectra komandası Spectra layihəsi ilə 1-ci yerə, ID Solver komandası isə Maze kateqoriyasında 3-cü yerə layiq görülüb.
AİRO 2026-da əldə etdiyi nəticə əsasında ID Spectra komandası növbəti beynəlxalq yarışda iştirak etmək hüququ qazanıb. Komandanın Yunanıstanın Krit adasında keçiriləcək MRC Global Olympiad yarışında iştirak etməsi nəzərdə tutulur.
2026-cı il ərzində əldə olunan bu nəticələr IDSchool tələbələrinin robotika, proqramlaşdırma, mühəndislik və innovasiya istiqamətlərində praktiki biliklərini beynəlxalq platformalarda nümayiş etdirdiyini göstərir. Şagirdlər müxtəlif layihələr üzərində çalışaraq real problemlərə texnoloji həllər hazırlayır, beynəlxalq yarışlarda öz layihələrini təqdim edir və fərqli ölkələrdən olan iştirakçılarla rəqabət aparmaq imkanı əldə edirlər.
Qazanılan mükafatlar və beynəlxalq yarışlarda iştirak imkanları tələbələrin texniki bilikləri ilə yanaşı, komanda işi, layihə təqdimatı, problem həlli və innovativ düşüncə bacarıqlarının inkişafına da mühüm töhfə verir. IDSchool tələbələrinin növbəti beynəlxalq yarışlarda da Azərbaycanı və məktəbi layiqincə təmsil etməsi gözlənilir.
