CEFR Azərbaycan dilinə tərcümə edilib
“Dillərin öyrənilməsi, tədrisi və qiymətləndirilməsi üzrə tövsiyə çərçivə sənədi” (CEFR) ilk dəfə Azərbaycan dilinə tərcümə olunaraq oxuculara təqdim edilib.
Bu barədə Dövlət İmtahan Mərkəzindən (DİM) məlumat verilib. Bildirilib ki, “Common European Framework of Reference for Languages: Learning, Teaching, Assessment” sənədinin ingilis dilindən Azərbaycan dilinə tərcüməsi Dövlət İmtahan Mərkəzinin İdarə Heyətinin sədri Məleykə Abbaszadənin rəhbərliyi və təşəbbüsü ilə 2020-ci ildən başlayaraq Azərbaycan Dövlət Tərcümə Mərkəzində həyata keçirilib. Sənəd DİM-in Dövlət dili və xarici dillər üzrə şöbəsi, həmçinin “Abituriyent” jurnalı redaksiyasının əməkdaşları tərəfindən redaktə olunub. Bu təşəbbüs dilin tədrisinin keyfiyyətini artırmaq, bilik və bacarıqların beynəlxalq standartlara uyğun qiymətləndirilməsini təmin etmək, tədris proqramları və yoxlama-ölçmə materiallarının metodoloji bazasını gücləndirmək məqsədi daşıyır.
Qeyd edək ki, artıq bir neçə ildir ki, Dövlət İmtahan Mərkəzi tərəfindən təhsilin fərqli səviyyələrində keçirilən imtahanların xarici dil bloku CEFR-in müvafiq səviyyələrinə uyğunlaşdırılır. Sözügedən imtahanlarda xarici dillərə yiyələnmə səviyyəsinin müəyyənləşdirilməsi üzrə ümum-Avropa tövsiyə çərçivə sənədinə, həmçinin beynəlxalq dil imtahanlarının strukturuna müvafiq olaraq, imtahan verənlərin xarici dillər üzrə dinləyib-anlama, oxuyub-anlama, yazı və danışıq bacarıqlarının yoxlanılıb qiymətləndirilməsi həyata keçirilir. Buna görə də Azərbaycan dilinə tərcümə edilmiş tamamlayıcı cild dilin tədrisi üçün kurikulumların, dərslik və vəsaitlərin, həmçinin dil üzrə bilik və bacarıqların ölçülməsi məqsədilə materialların hazırlanmasında müstəsna rola malikdir. Bu sənədin dil öyrənənlərin bilik və bacarıqlarının standart şəkildə qiymətləndirilməsinə, etibarlı yoxlama-ölçmə materiallarının hazırlanlanmasına, dil üzrə bilik və bacarıqların müqayisə olunmasına, həmçinin tədris prosesinin təsbit olunmuş dil standartları əsasında tədrisinə şərait yaradacaqdır.
CEFR sənədinin Azərbaycan dilinə tərcüməsi, təhsil sahəsində mühüm bir nailiyyət olmaqla yanaşı, həm də ölkəmizin dünya təhsil sisteminə inteqrasiyasını gücləndirəcəkdir. Sənədin Azərbaycan dilinə tərcümə olunmuş versiyası Avropa Şurasının saytının müvafiq bölməsində, həmçinin Dövlət İmtahan Mərkəzinin internet səhifəsində yerləşdirilib.
