ADU-da “Heydər Əliyev və diaspor quruculuğu” mövzusunda dəyirmi masa keçirilib

Azərbaycan Dillər Universitetinin (ADU) Multikulturalizm Mərkəzi "Azərbaycanşünaslıq” Elmi Mərkəzinin təşkilatçılığı ilə Ulu Öndər Heydər Əliyevin 100 illik yubileyinə həsr olunmuş "Heydər Əliyev və diaspor quruculuğu” mövzusunda dəyirmi masa keçirilib.

ADU-dan "tehsilmedia.info"a bildirilib ki, Multikulturalizm Mərkəzinin müdiri Loğman Rəşidzadənin moderatorluğu ilə keçən tədbirdə AMEA Fəlsəfə İnstitutunun əməkdaşı Zaur Əliyev geniş məzmunlu məruzə ilə çıxış edib. Məruzədə Azərbaycan diasporunun bugünkü vəziyyətindən, strukturundan, xüsusiyyətlərindən geniş bəhs edilib. Bildirilib ki, dünyada azərbaycanlıların təşkilatlanması, diaspora şəklində formalaşması Ulu Öndər Heydər Əliyevin xarici siyasətinin prioritetlərindən birini təşkil edib.

Məruzə ətrafında müzakirələrdə Qorxmaz Mustafayev, İbrahim Kazımbəyli, Asif Abbasov, Sevdagül Əliyeva, Əli Məmmədov və başqaları çıxış edərək xarici ölkələrdə formalaşan Azərbaycan diasporunun inkişaf yollarından, problemlərindən və Ulu Öndərin bu qurumlara qayğı və diqqətindən söz açıblar.

Tədbiri yekunlaşdıran universitetin rektoru akademik Kamal Abdulla diaspor probleminə elmi–nəzəri cəhətdən yanaşmanın vacibliyini qeyd edib və bu mühüm məsələnin Ulu Öndərin siyasi varisi Azərbaycan Prezidenti İlham Əliyev tərəfindən uğurla aparıldığını vurğulayıb.