Fenomenləri kim yaradır: Ağılsız kütlə yoxsa savadsızlıq? – Fərqanə Mehmanqızı AÇIQLAYIR

Son vaxtlar sosial şəbəkələrdə ekran qarşısına çıxan azyaşlıların sayı artıb. Onların mənəvi dəyərlərə zidd paylaşımlar etməsi insanları narahat edib.

Azyaşlılar nəyə görə sosial mediada cəmiyyətə zərər vuran paylaşımlar etməyə meyllidirlər?

Psixoloq Fərqanə Mehmanqızı bunun əsas səbəblərini Ednews-a açıqlayıb. O, bildirib ki, ailənin əxlaq və tərbiyəsi yoxdursa, bu uşaqların ekran qarşısında rəftarında özünü göstərir.

“Günümüzdə uşaqlar sosial media və texnologiyalarla bir yerdə böyüyürlər. Ona görə də sosial medianın onlara mənfi təsir etməsini birdəfəlik qəbullanmaq olmaz. Lakin, sosial şəbəkələrdə fenomen olan uşaqların psixoloji problemləri ailədən gəlir. Yəni onları kamera qarşısında olmaq korlamayıb. Sosial mediada qeyri-etik hərəkətlər edən azyaşlılar öz valideynlərinin davranışlarını ekranlar qarşısında təkrar edirlər. Ailə mədəniyyəti olmayan və sosial problemləri olan gənclər mənasız paylaşımların çox izlənməsi görürlər və bu onları daha da həvəsləndirir”.

Psixoloq sosial mediada lazımsız kontentlər paylaşan gənclərin sayının artmasını izləyici kütlələrin ağılsızlaşması ilə əlaqələndirib.

“Əgər uşaqlar ekran qarşısına çıxıb mənasız paylaşımlar etməyə davam edirsə, bunun əsl səbəbi auditoriyanın ağılsızlaşmasıdır. Insanlar fərqində olmadan bu lazımsız paylaşımlardan həzz alır. Əgər sosial media vasitəçisi bu kimi paylaşımlardan zövq almırsa, nəyə görə izləyir? Bunu bəlkə də heç kim etiraf etməyəcək, amma bir çoxları cəmiyyətə heç bir töhfə verməyən neqativ konteksdə olan videoları izləyir. Həqiqətən lazımlı və dəyərli formatlar isə demək olar ki, insanların diqqətini cəlb etmir.

Məsələ burasındadır ki, insanlar öz şüuraltında, fərqində olmadan əxlaqsızlıq yayan insanlara simpatiya duyurlar. Xarici dünyaya bildirməsələr də həmin videolardakı insanlar kimi olmağa çalışırlar. Bu haqda danışdıqda isə, həmin kontentləri pisləyirlər. Sadəcə olaraq anlamaq lazımdır ki, bu kimi paylaşımları var edən kütlələrdir”.