LDU kollektivi “Qarabağnamə” tamaşasını izləyib
Mədəniyyət Nazirliyinin Ümummilli Lider Heydər Əliyevin 100, Azərbaycan peşəkar milli teatrının yaranmasının 150 illiyinə həsr edilmiş layihəsi çərçivəsində dekabrın 11-də Azərbaycan Dövlət Akademik Milli Dram Teatrı “Qarabağnamə” tamaşası ilə Lənkəran Dövlət Dram Teatrında Lənkəran Dövlət Universitetinin kollektivi qarşısında çıxış edib. LDU-nun rektoru, prof. Natiq İbrahimov başda olmaqla universitetin professor-müəllim-tələbə-işçi heyəti Xalq yazıçısı İlyas Əfəndiyevin “Hökmdar və qızı” pyesi əsasında hazırlanmış tamaşanı kollektiv şəkildə izləyib.
tehsilmedia.info xəbər verir ki, peşəkar aktyor heyətinin ifasında “Qarabağnamə” tamaşası LDU kollektivi tərəfindən alqışlarla qarşılanıb. Aktyorlara təzə-tər payız çiçəkləri təqdim edilib. Tamaşanın sonunda universitetin rektoru, prof. Natiq İbrahimov çıxış edərək kollektiv adından maraqlı səhnə əsərinə görə Akademik Milli Dram Teatrının kollektivinə və aktyor heyətinə minnətdarlığını bildirib.
Qeyd edək ki, quruluşçu rejissoru Xalq artisti Mərahim Fərzəlibəyov olan səhnə əsərində XVIII əsrdə Qarabağ xanlığının mərkəzi olan Şuşada baş vermiş tarixi hadisələrdən bəhs olunur. Tamaşada İbrahim xan ictimai-siyasi, ailə-məişət hadisələri burulğanında mürəkkəb, təzadlı, faciəvi xarakter kimi təsvir edilir. Məmləkətin xanlıqlara parçalanması, düşmənə qarşı ittifaqın olmaması məğlubiyyətin və faciənin əsas amilləri kimi göstərilir.
Tamaşada rolları Xalq artistləri Kazım Abdullayev, Firəngiz Mütəllimova, Rafiq Əzimov, Hacı İsmayılov, Əli Nurzadə, əməkdar artistlər Elşən Rüstəmov, Məsmə Aslanqızı, Kazım Həsənquliyev, Elxan Quliyev, Elşən Cəbrayılov, Elnar Qarayev, aktyorlar Nigar Güləhmədova, İlyas Əhmədov, Ramin Şıxəliyev, Ləman İmanova, Cavidan Novruz, Firuzə Balayeva, Nəzrin Abdullayeva, Məhsəti Tahirzadə, Elsevər Rəhimov və Tural İbrahimov ifa ediblər.
Səhnə əsərinin quruluşçu rəssamı İsmayıl Məmmədov, geyim rəssamı Aygün Mahmudova, işıq üzrə rəssamı Rafael Həsənov, musiqi tərtibatçısı Həmid Kazımzadədir. Tamaşada Xalq artistləri Polad Bülbüloğlu və Vasif Adıgözəlovun əsərlərindən istifadə olunub.
Xatırladaq ki, İlyas Əfəndiyevin “Hökmdar və qızı” əsəri əsasında tamaşa ilk dəfə 1996-cı ildə nümayiş olunub. Tamaşa böyük müvəffəqiyyət qazanıb və 1997-ci il sentyabrın 20-də Ümummilli Lider Heydər Əliyev Milli Dram Teatrının səhnəsində tamaşanı maraqla izləyib. Tamaşaya baxdıqdan sonra yaradıcı heyətlə görüşdə Heydər Əliyev əsəri yüksək qiymətləndirib, onun təbliğinin vacibliyini bildirib: “Mən hesab edirəm ki, bu əsər çox aktualdır, çox ibrətamizdir, dəyərli əsərdir. Bu əsərin çox böyük əhəmiyyəti var. Hesab edirəm ki, bu bizim mədəniyyət həyatımızda çox əlamətdar hadisədir. Bu əsəri çox geniş təbliğ etmək lazımdır”.
