ADNSU-da “ÇASGEM” -ın nümayəndələri ilə görüş keçirilib

Noyabrın 30-da Azərbaycan Dövlət Neft və Sənaye Universitetində (ADNSU) Türkiyənin Əmək və Əhalinin Sosial Müdafiəsi Nazirliyinin nəzdində fəaliyyət göstərən “ÇASGEM”-ın (Çalışma ve Sosyal Güvenlik Eğitim ve Araştırma Merkezi) nümayəndələri ilə görüş keçirilib.

tehsilmedia.info xəbər verir ki, qonaqları universitetdə salamlamaqdan məmnun olduğunu deyən ADNSU-nun rektor əvəzi, dosent Vazeh Əskərov universitet, tədris prosesi, ixtisaslar, beynəlxalq əməkdaşlıq əlaqələri, həmçinin ikili diplom proqramları və layihələr haqqında məlumat verib. Türkiyə ali təhsil müəssisələri və qurumları ilə əməkdaşlığın daha da genişləndirilməsinin əhəmiyyətindən danışan dosent Vazeh Əskərov “ÇASGEM” ilə əməkdaşlığın səmərəli olacağına əminliyini bildirib.

Qonaqpərvərliyə və diqqətə görə təşəkkürünü bildirən Türkiyənin Əmək və Sosial Müdafiə Təlim və Araşdırma Mərkəzinin rəhbəri Elif Gökçearslan təmsil etdiyi qurumun fəaliyyəti haqqında ümumi məlumat verib. O, ADNSU ilə bir çox sahələrdə, xüsusilə də neft-kimya sahəsində peşə hazırlığının, distant təlimlərin keçirilməsində birgə təcrübədən yararlanmaqda və birgə əməkdaşlıqda maraqlı olduqlarını bildirib, neft-kimya sahəsində təcrübələrini bölüşməyə hazır olduqlarını qeyd edib.
Sonda qarşılıqlı xatirə hədiyyələri təqdim edilib.

Görüşdən sonra türkiyəli qonaqlar ADNSU-da şəhidlərin abidə kompleksini ziyarət ediblər, Azərbaycan-Türkiyə Dostluq Mərkəzi ilə tanış olublar.