Əlyazmalar İnstitutunun alimləri Səmərqənddə keçirilən beynəlxalq konqresdə iştirak ediblər- FOTO
AMEA-nın Məhəmməd Füzuli adına Əlyazmalar İnstitutunun elmi katibi, fil.ü.f.d., dosent Əzizağa Nəcəfzadə və həmin institutun Əlyazmaların elektron resurslar şöbəsinin müdiri, fil.ü.f.d., dosent Aynur Nəcəfova 5-8 noyabr 2023-cü il tarixlərində Özbəkistan Respublikasının Səmərqənd şəhərində keçirilən “Özbəkistanın mədəni irsi yeni intibahın təməlidir” mövzusunda VII beynəlxalq konqresdə iştirak ediblər.
Bu barədə "tehsilmedia.info"a institutdan bildirilib.
Özbəkistanın mədəni irsinin öyrənilməsi, qorunması və təbliği üzrə Ümumdünya Təşkilatının təşəbbüsü ilə təşkil olunan növbəti konqresin açılış mərasimində dosent Əzizağa Nəcəfzadə “Mərkəzi Asiyanın və Azərbaycanın muzey və kitabxanalarının kolleksiyalarında Özbəkistanın mədəni mirası” adlı müzakirə panelinin moderatoru qismində çıxış edib.
Növbəti gün “Ümumdünya Konqresinin layihələrində Mərkəzi Asiyanın muzey və kitabxanaları” mövzusunda keçirilən konfransda dosent Əzizağa Nəcəfzadə və dosent Aynur Nəcəfova “AMEA-nın Məhəmməd Füzuli adına Əlyazmalar İnstitutunun fondlarında mühafizə olunan Əlişir Nəvai əsərlərinin əlyazma nüsxələri” adlı məruzə ilə çıxış ediblər. Böyük özbək şairi, mütəfəkkiri və görkəmli dövlət xadimi Əlişir Nəvainin əsərlərinin Bakı nüsxələri, onların qorunması, tədqiqi, elektronlaşdırılması və təbliği istiqamətində icra olunan işlər barədə ətraflı məlumat verilən bu məruzə iştirakçıların böyük marağına səbəb olub, məruzəçilər onlara ünvanlanan sualları cavablandırıblar.
7 noyabr 2023-cü il tarixində Özbəkistanın mədəni irsinin öyrənilməsi, qorunması və təbliği üzrə Ümumdünya Təşkilatının İdarə Heyətinin sədri, sənətşünaslıq ü.f.d. Firdovs Abdulxaliqov və Məhəmməd Füzuli adına Əlyazmalar İnstitutunun elmi katibi, fil.ü.f.d. Əzizağa Nəcəfzadə arasında görüş keçirilib. Görüşdə “Azərbaycanda qorunan Özbəkistanın mədəni irsi” adlı kitab-albomun siqnal nüsxəsi müzakirə olunub. Bildirilib ki, Ümumdünya Konqresinin VII qurultayında təqdim olunan bu nəfis nəşr cari il ərzində çapa hazırlanıb və kitab-alboma Əlyazmalar İnstitutunun mütəxəssisləri tərəfindən təsvir etdilən özbək müəlliflərinin əsərlərinin Bakı nüsxələri haqqında qısa məlumat və nadir yazılı materialların fotoşəkilləri də daxil edilib.
Həmin günün sonunda elmi biliklərin qarşılıqlı mübadiləsi və səmərəli işgüzar müzakirə şəraitində davam edən Konqresin təntənəli bağlanış və mükafatlandırma mərasimi keçirilib. Mərasimdə Əlyazmalar İnstitutunun alimləri - Ə.Nəcəfzadə və A.Nəcəfova özbək mədəni irsinin qorunması, öyrənilməsi və təbliğindəki xidmətlərinə görə Özbəkistanın mədəni irsinin öyrənilməsi, qorunması və təbliği üzrə Ümumdünya Təşkilatının xüsusi sertifikatına layiq görülüblər. Tədbirin sonunda institut əməkdaşlarına milli özbək xalatları hədiyyə olunub.
8 noyabr tarixində Əlyazmalar İnstitutunun alimləri Konqres nümayəndələri üçün təşkil olunan Səmərqənd şəhərinin qədim və tarixi yerlərinə ekskursiyaya qatılıblar. Günün sonunda alimlərimiz Azərbaycan nümayəndə heyəti ilə birlikdə 8 Noyabr - Zəfər Gününü qeyd ediblər.
