Braziliyalı diplomat ADU-nun "Səfir saatı" layihəsinin qonağı olub - FOTO

Oktyabrın 30-da Braziliyanın Azərbaycandakı səfiri Manuel Adalberto Karlos Monteneqro Lopes da Kruz Azərbaycan Dillər Universitetinin (ADU) “Səfir saatı” layihəsinin qonağı olub.

Bu barədə "tehsilmedia.info" a ADU-dan bildirilib.

Rektor Kamal Abdulla qeyd edib ki, ADU tələbələri portuqal dilinə böyük maraq göstərirlər və müəllimlər tələbələrə portuqal dilinin sirlərini dərindən öyrədirlər. Portuqal dilinin öyrənilməsi Braziliya mədəniyyətinin, ədəbiyyatının, tarixinin təbliği deməkdir: “Biz çox istərdik ki, Braziliyada da Azərbaycan mədəniyyəti, dili təbliğ olunsun. Bunun üçün bizim əlaqə qurduğumuz universitetdə Azərbaycan dili ilə bağlı təbliğat işlərinin görülməsi vacib məsələlərdən biridir. Qarşılıqlı müəllim-tələbə mübadiləsi bizə yeni elmi imkanların əldə olunması üçün əlverişli şərait yaradacaq. İnanıram ki, bu istiqamətdə də uğurlu nəticələr əldə edə biləcəyik”.

Səmimi qarşılanmaya və xoş sözlərə görə təşəkkürünü bildirən səfir ADU ilə elmi əməkdaşlığın perspektivlərindən danışıb. Bu təhsil ocağında portuqal dilinin tədrisini yüksək qiymətləndirən diplomat “Səfir saatı” layihəsində tələbələrlə görüşdən xoş təəssüratla ayrıldığını deyib.

Qeyd olunub ki, ölkələrimiz arasında dostluq və tərəfdaşlıq münasibətləri yüksələn xətlə inkişaf edir. Bu inkişaf özünü elmi, mədəni sahələrdə də göstərir.

Görüşdə gələcək elmi əməkdaşlığın yeni imkanları, mədəni tərəfdaşlığın yeni perspektivləri müzakirə olunub.