"Şəhid və məcburi köçkün ailələri məktəbli forması ilə pulsuz təmin olunsun" - TƏKLİF

"Respublikanın demək olar ki, 4500-dən çox orta təhsil müəsssisələrində şagirdlər məktəbə vahid formada gedirlər".

tehsilmedia.info xəbər verir ki, bunu "Tehsil.biz"ə açıqlamasında təhsil eksperti Kamran Əsədov deyib.

Onun sözlərinə görə, bu, təhsilin keyfiyyətinə müsbət təsir göstərməklə yanaşı, həm də nizam-intizamın yaxşılaşmasına gətirib çıxarır:

"Bir məqamı xüsusi qeyd etmək lazımdır ki, hər bir məktəbin pedaqoji şurası öncədən müəyyən olunan dizayn və məktəbli formalarının etiketlərini məktəb kollektivi ilə müzakirəyə çıxarır. Məktəb üçün uyğun hesab olunan dizaynda qəbul edilən məktəbli forması həmin tədris ili üçün vahid forma kimi qəbul edilir. Hətta bəzi orta ümumtəhsil məktəblərimiz ibtidai və yuxarı sinif şagirdləri üçün fərqli məktəbli formaları tətbiq edirlər. Düzdür, bəzi hallarda məktəb direktorları tikiş evləri ilə qeyri-rəsmi razılıq əldə edir ki, o bütün şagirdləri ancaq o satış dükanından almağa yönəldir. Qeyd edim ki, hər valideyn məktəb tərəfindən təsdiq edilmiş formanın eskizini əldə edərək övladının geyimini istədiyi yerdə tikdirə bilər, lakin formanın təsdiq edilən standartlara uyğun olması şərti ilə. Yəni hər bir valideyn məktəb tərəfindən qəbul edilmiş standartlara uyğun olan formanı özü tikdirə bilər. Bu, qanunla qadağan olunmayıb. Əgər valideynlərə tikiş evləri tərəfindnə təklif edilən geyimlər baha gələrsə, bu zaman özləri bu məsələni həll edə bilərlər".

Ekspert məktəbli formalarının dizaynının Elm və Təhsil Nazirliyi tərəfindən müəyyən olunmasını təklif edib:

"Əvvəllər bir formanı uşaq ən azı iki il geyinirdi. Bakı Tikiş Evinin tikdiyi məktəbli formalarının bir tədris ili keçməmiş rəngi solur, paltar süzülür. Bazarda da yalnız bir tikiş müəssisəsinin geyimləri olduğundan biz hər il uşağa yeni məktəbli forması alırıq. Şalvar və ətəklərin isə heç bir il keçməmiş keyfiyyəti itir. Bizim təklifimiz odur ki, Elm və Təhsil Nazirliyi məktəbli formasının dizaynını müəyyən etsin, bu formaların tikilişi sərbəst olsun. Hər bir valideyn istədiyi tikiş müəssisəsində bu geyimi öz övladının ölçüsünə uyğun tikdirə bilsin. Çünki bir tikiş evində standart tikilən formalar çox vaxt uşaqların ölçüsünə uyğun gəlmir. Qiyməti isə bahadır".

"Düşünürəm ki, bütün şəhid və məcburi köçkün ailələri, eləcə də aztəminatlı ailələr pulsuz məktəbli forması ilə təmin olunmalıdır", - deyə Kamran Əsədov əlavə edib.