Kosmosda "nəhəng güzgü"yə bənzər planet kəşf edilib
Astronomların fikrincə, mövcud olması mümkünsüz planet kəşf edilib.
tehsilmedia.info azedu.az-a istinadən xəbər verir ki, tədqiqatçılar bazar ertəsi Günəş sistemindən kənarda Neptundan bir qədər böyük olan isti bir "dünya" kimi görünən ekstremal planet aşkarladıqlarını bildiriblər.
Məlumata görə, planet Günəşəbənzər ulduzun ətrafında hər 19 saatdan bir dövrə vuran, artıq işığı kainata geri qaytaran titan və silikatlardan ibarət metal buludlara bükülmüş şəkildədir.
Astronomy & Astrophysics jurnalında dərc olunan araşdırmanın həmmüəllifi Dieqo Portales Universitetindən və Çilidəki Astrofizika və Əlaqəli Texnologiyalarda Mükəmməllik Mərkəzindən (CATA) astronom Ceyms Cenkinsin sözlərinə görə, bu, kosmosda nəhəng bir güzgüdür.
Sözügedən planet daxil olan işığın təxminən 80%-ni əks etdirir, bu da onu kainatın ən çox işıq əks etdirən obyektinə çevrir. Aydan başqa Yerin gecə səmasında ən parlaq obyekt olan Venera, zəhərli sulfat turşusu buludları ilə örtülmüş Günəş sisteminin ən çox işıq saçan obyektidir. Venera gələn işığın təxminən 75%-ni, Yer isə təxminən 30%-ni əks etdirir.
Fransadakı Marsel Astrofizika Laboratoriyasından astronom və tədqiqatın aparıcı müəllifi Sergio Hoyer bildirib ki, bu günə kimi heç belə bir planet kəşf edilməyib.
LTT9779b adlı planet və onun ulduzu Süd Yolu qalaktikasında Yerdən təxminən 264 işıq ili uzaqlıqda, "Sculptor" ulduz qrupu istiqamətində yerləşir. Planetin diametri Yerdən təxminən 4,7 dəfə böyükdür
Qeyd edək ki, işıq ili işığın bir ildə qət etdiyi məsafədir, təxmini 9,5 trilyon km kimi hesablanır.
