Xaricdə təhsil! – “Bu diplomlar tanınmır və nazirlik haqlıdır” – Nə etməli?

“Nazirlik bu diplomları tanımamaqda haqlıdır”


tehsilmedia.info xəbər verir ki, bu sözləri azedu.az-a açıqlamasında sabiq millət vəkili Sona Əliyeva bəzi xarici universitetlərin verdiyi diplomların Azərbaycanda tanınmamasından danışarkən deyib.

Onun sözlərinə görə, ölkəmizdə ali məktəblərə qəbul imtahanlarından aşağı nəticə əldə etmiş abituriyentlər təhsil almaq üçün xarici ölkələrə, xüsusən də, Türkiyəyə üz tuturlar:

“Əsasən Türkiyəyə üz tutmalarının səbəblərindəın biri dil baryeri olmamasıdır, çünki türk dili ana dilimizə çox yaxındır, türk dilini öyrənmək və o dildə təhsil almaq onlara asan gəlir. Digər tərəfdən oxşar cəmiyyət və mətbəxin olması da bu işi xeyli asanlaşdırır. Lakin eyni zamanda, Türkiyədə təhsil almaq elə də asan deyil. Bəziləri aşağı balla gedib, bir neçə il kursda qalırlar.

Xaricdə təhsil alan şəxslərin bir çoxu diplomunu da tanıda bilmir. Ümumiyyətlə, şagirdlər və valideynləri xaricdə universitet seçməzdən öncə diplomları tanınan universitetlərin siyahısı ilə mütləq tanış olmalıdırlar. Məsələn, Ukraynada, Gürcüstanda olan bəzi universitetlər var ki, orada təhsilə səhlənkar yanaşılır, onların diplomları Azərbaycanda tanınmır və nazirlik də tanımamaqda haqlıdır”.

S.Əliyeva diqqtə çatdırıb ki, aşağı bal toplayan abituriyentlərin xaricdə təhsil almasının əleyhinədir:

“Çünki Azərbaycanda təhsil almaq daha asandır, nəinki xarici ölkədə. Türk dilində oxumaq validenylərə asan gəlsə də, akademik dil çox çətindir. Digər ölkələrdə təhsil almaq üçün də dil faktoru daha çox problem yaradır. Gündəlik danışıq dilini bilmək akademik səviyyədə bilmək demək deyil. Tələbə mənəvi, psixoloji cəhətdən hazır deyilsə, onu xaricə göndərməyin heç bir mənası yoxdur.

Çox istərdim ki, Azərbaycanda ali təhsil stereotipinin maneələri aşılsın. Ali diplomu olan şəxs başa düşməlidir ki, bu o demək deyil ki, sən o dəqiqə əmək bazarında iş tapacaqsan. Artıq texnologiya elə inkişaf edib ki, dil baryeri aradan qalxıb. Dünyada baş verən iqtisadi, elmi, texnoloji inkişaf artıq diplom yox, insanların bilik və bacarıqlarına üstünlük verilməsinə gətirib çıxarıb”.

Sonda pedaqoq abituriyent və onların valideynlərinə tövsiyələr verib:

“Valideynlərə tövsiyə edirəm ki, övladlarını peşə öyrənməyə yönləndirsinlər. İndiki zamanda siz bir avtomobil, dırnaq, saç ustasının yanına getmək istəyirsinizsə, bir neçə gün öncədən növbəyə yazılmalısınız. İndi yaxşı peşə sahibinin növbəsinə yazılmaq məmurun qəbuluna düşməkdən çətindir. Azərbaycanda insanlar peşələrdən çox yaxşı pul qazanır. Düşünürəm ki, mütləq peşəyə yiyələnmək lazımdır. Xüsusən də, seçim edərkən indi və gələcəkdə trend olacaq sahələr araşdırılmalıdır. Gənclərə səslənirəm ki, bilik və bacarıqlar qazanın, qloballaşan dünyada sürətli adaptasiya olmaq qabiliyyətini formalaşdırın, çevik olun, həmişə informasiya axtarın və onu istifadə etməyi də bacarın. Əgər bunları etsəniz, siz elə diplomsuz da bu həyatda uğur qazana bilərsiniz”.