Sertifikasiya müəllimlərin imtahan psixologiyasını daha yaxşı anlamasına şərait yaradır - Nazir

“Sertifikasiyaya cəlb olunan müəllimlərdə şagirdlərin imtahan psixologiyasını daha dərindən anlamaq, onlara bu istiqamətdə daha səmərəli dəstək olmaq təcrübəsi artır”.

Redaktor.az xəbər verir ki, bu sözləri “Azərbaycan müəllimi”nə Naxçıvan Muxtar Respublikasının təhsil Elxan Nəcəfov deyib.

O bildirib ki, bu proses əslində tədrisin keyfiyyətinin artırılması baxımından mühüm əhəmiyyət kəsb edir: “Müəllim uzun müddət ərzində şagirdini yetişdirir, ona bilikləri mənimsəməyi, testləri əsasən rahat mühitdə həll etmə bacarığını formalaşdırır. Şagird imtahan zamanı bəzən ciddi psixoloji gərginlik yaşayır, öyrəndiyi bilikləri tam şəkildə ifadə edə bilmir. Bu da əsasən imtahan həyəcanı və stres faktorları ilə bağlı olur. Məhz bu baxımdan müəllimlərin sertifikasiyaya cəlb olunması onların özünün də imtahan mühitini təkrar təcrübədən keçirməsinə, bu prosesə daha real yanaşmasına şərait yaradır. Bu proses müəllimlərə imtahan mühitini şəxsən təcrübə etməyə, həmin şəraitin yaratdığı psixoloji-emosional gərginliyi hiss etməyə və buna daha real yanaşmağa şərait yaradır. Nəticədə müəllimlər şagirdlərin qarşılaşdığı çətinlikləri daha yaxşı anlayır və tədris prosesində bunu nəzərə ala bilirlər”.

Nazir vurğulayıb ki, nəticə etibarilə sertifikasiya prosesi təkcə müəllimlərin bilik və bacarıqlarının qiymətləndirilməsi, sosial rifah halının yaxşılaşdırılması deyil, həm də tədris prosesinin keyfiyyətinə müsbət təsir göstərən mühüm mexanizmdir: “Bu yanaşma müəllim-şagird münasibətlərində empatiyanı gücləndirir və ümumilikdə məktəbdə tədrisin daha səmərəli təşkilinə töhfə verir”.