Nə qədər məzun təhsil aldığı universitetdə çalışır? - SORĞU
Ali təhsil müəssisələrində professor-müəllim heyətinin formalaşması akademik mühitin keyfiyyətinə birbaşa təsir göstərən əsas amillərdəndir. Bu kontekstdə, müəllimlərin hansı faizinin çalışdıqları universitetin və ya akademiyanın məzunları olması mühüm göstərici kimi çıxış edir. Belə bir göstərici institusional davamlılıq, akademik ənənələrin qorunması və daxili kadr potensialının inkişafı baxımından əhəmiyyət daşıyır.
Ali təhsil müəssisələrində fəaliyyət göstərən professor-müəllim heyətinin neçə faizi çalışdığı universitetin və ya akademiyanın məzunlarıdır?
Mövzu ilə bağlı AzEdu.az Təhsil Portalı universitetlərə sorğu ünvanlayıb.
Sorğumuza cavab olaraq Azərbaycan Dövlət Neft və Sənaye Universitetindən (ADNSU) bildirilib ki, universitetdə fəaliyyət göstərənlər içərisində məzunlarımızın sayı çoxluq təşkil edir.
“Onlar bu gün həm tədrisdə, həm də tədqiqatda uğurlu nəticələr göstərirlər. Universitet olaraq öz məzunlarımıza hər zaman üstünlük veririk. Ona görə ki, onlar mühəndis profilli ali təhsil müəssisəsində təhsil alıblar. Yəni ixtisas uyğundur və universitet onlara daha doğmadır”.
Azərbaycan Universitetindən (AU) əldə etdiyimiz məlumata əsasən, Azərbaycan Universitetinin professor-müəllim heyətinin təxminən 15 faizə yaxını universitet məzunlarıdır:
“Professor-müəllim heyətinin müəyyən bir hissəsinin universitetin öz məzunlarından ibarət olması akademik mühitdə davamlılıq və institusional yaddaşın qorunması baxımından müsbət amildir. Universitetin dəyərləri, korporativ mədəniyyəti və standartları daha asan, sistemli şəkildə qorunur və möhkəmlənir. Digər yandan universitetin məzunları daxili prosedurları yaxşı bildikləri üçün mühitə və işə tez uyğunlaşırlar.
Eyni zamanda, bu göstəricinin ümumi paya nisbətdə məhdud olması təxminən 15 faiz səviyyəsində qalması, kadr siyasətində açıq rəqabət prinsipinin saxlanıldığını, müxtəlif yerli və xarici universitetlərdə təhsil alan mütəxəssislərin universiteə cəlb edildiyini göstərir. Bu yanaşma akademik mühitdə intellektual müxtəlifliyin və keyfiyyətli rəqabətin balanslı şəkildə qorunmasına imkan yaradır".
Lənkəran Dövlət Universitetindən (LDU) məlumat verilib ki, LDU-da fəaliyyət göstərən professor-müəllim heyətinin 39 faizi universitetin məzunlarıdır:
“Bu göstərici ali təhsil müəssisəsində formalaşmış akademik ənənələrin davamlılığını təmin etməklə yanaşı, iş mühitinə müsbət təsir göstərir”.
Azərbaycan Tibb Universitetindən (ATU) qeyd olunub ki, Azərbaycan Tibb Universitetində professor-müəllim heyətinin əksəriyyəti universitetimizin məzunlarıdır:
“Tarixi olaraq tibbi kadrların hazırlanması əsasən ATU tərəfindən həyata keçirildiyi üçün profil kafedralarda çalışan əməkdaşların çoxu bizim məzunlarımızdır. Eyni zamanda, İctimai fənlər, Biologiya və Fizika-riyaziyyat sahələrini tədris edən müəllimlər digər universitetlərin məzunlarıdır. Son illərdə isə Türkiyə və digər xarici ölkələrdə təhsil almış mütəxəssislər də universitetimizdə fəaliyyət göstərir.
Kafedralarda professor-müəllim heyətinin davamlı ixtisasartırması və peşəkarlıq səviyyəsinin yüksəldilməsi akademik mühitimizin keyfiyyətinə müsbət təsir göstərir və universitetimizin rəqabət qabiliyyətini artırır”.
Azərbaycan Texniki Universitetindən (AzTU) bildirilib ki, professor-müəllim heyətinin 44%-i bu universitetin məzunlarıdır:
“Bu gösrətici əlbəttə akademik mühitin keyfiyyətinə və rəqabətliliyinə müsbət təsir edir. İlk növbədə məzunlar institusional yaddaşa malik olurlar. Onlar universitetin tədris fəlsəfəsini, akademik ənənəsini dərindən bilirlər. Bundan başqa, bu tendensiya uzun illər ərzində formalaşmış bilik və təcrübələrin, həmçinin tədqiqat istiqamətlərinin dərinləşməsinə də töhfə verə bilər.
Azərbaycan Dövlət Pedaqoji Universitetindən (ADPU) aldığımız məlumata görə, universitetdə fəaliyyyət göstərənlərin 49.2%-i ADPU-nun öz məzunudur.
Bakı Avrasiya Universitetindən (BAAU) bildirilib ki, hazırda ümumi universitetin akademik heyəti 198 nəfərdir:
“Onlardan 18 nəfəri bizim öz məzunlarımızdır. Bu da öz növbəsində 10% təşkil etmiş olur”
