Seymur İsmayılovun Elm və Təhsil Nazirliyi ilə tender oyunları
Elm və Təhsil Nazirliyi iki tenderinin nəticəsini açıqlayıb.
XALQ xəbər verir ki, nazirliyin Təsərrüfat Hesablı Əsaslı Tikinti və Təchizat İdarəsi öncəliklə “VIVA MEDICAL GROUP” MMC ilə anlaşıb.
Tədris laboratoriyaları və STEAM istiqamətli mərkəzlər üçün avadanlıqların satınalınmasını həyata keçirmək üçün İdarə MMC-nin hesabına 9 milyon 950 min 83 manat 95 qəpik köçürəcək.
Nazirliyin keçirdiyi ikinci tenderin qalibi isə daha maraqlı şirkətdir. Belə ki, Təsərrüfat Hesablı Əsaslı Tikinti və Təchizat İdarəsi köhnə tanışı ilə ümumtəhsil müəssisələrinə “digər malların alınması” xərc maddəsi üzrə mallarının satınalınması məsələsində anlaşıb. Söhbət “SİMPLEX” QSC-dən gedir. Və bağlanılan müqavilənin dəyəri isə 3 milyon 981 min 830 manat 76 qəpik təşkil edir.
Tribunainfo.az xəbər verir ki, Elm və Təhsil Nazirliyinin “Simplex” şirkəti ilə son bir ildə 10 dəfə yolları kəsişib. Daha dəqiq desək, “Simplex” QSC yalnız nazirliyin tabeliyində və balansında olan müəssisələrin tenderlərini udub.
Belə ki, ötən bir ildə “Simplex” Elm və Təhisl Nazirliyin Təsərrüfat Hesablı Əsaslı Tikinti və Təchizat İdarəsinin keçirdiyi 8 tenderin qalibi olub. Həmin tenderlər üzrə şirkət nazirlikdən 57 milyon 468 min 146 manatlıq sifariş alıb. Həmin tenderlərdən ən qəribəsi isə dəftərxana ləvazimatları və təsərrüfat mallarının satın alınması ilə bağlıdır.
Araşdırma zamanı məlum olub ki, “SİMPLEX” QSC bu tenderlərdən birini 03.10.2024-cü ildə udub. Bunun müqabilində isə 19 milyon 254 min 645 manat 1 qəpik pul alıb. Həmin tenderin üzərindən 8 ay keçdikdən sonra isə şirkət eyni məzmunda ikinci tenderin də qalibi olub. Belə ki, 20.06.2025-ci ildə tərəflər arasındakı anlaşmanın dəyəri 19 milyon 421 min 921 manat 4 qəpik təşkil edib.
Bundan başqa, “Simplex” ETN-ə yumşaq mebel dəsti, kreslolar və digər avadanlıqlar da satıb. Açıq mənbələrdə qeyd edilir ki, son bir ildə şirkətlə nazirlik arasında bununla bağlı iki satınalma prosesi reallaşdırılıb. Onlardan biri 5 milyon 411 min 128 manat 9 qəpik, digəri isə 6 milyon 483 min 291 manat 66 qəpiyə başa gəlib.
Amma “Simplex” təhsil sektorundan kənara çıxmayıb. Tribunainfo.az xəbər verir ki, şirkət Azərbaycan Dövlət Neft və Sənaye Universitetinin də tenderlərinin qalibi olub. Son bir ildə universitetin 3 tenderini udaraq, heç də kiçik olmayan pullar qazanıb.
Həmin tenderlərdən ikisi ADNSU-nuin nəzdində fəaliyyət göstər Azərbaycan Fransız Universiteti üçün nəzərdə tutulub. Bu quruma tələb olunan reagentlərin, digər laboratoriya ləvazimatlarının və İT xidmətinin satın alınmasını ehtiva edib. Həmin anlaşmalardan birinin dəyəri 557 min 873 manat, digəri isə 781 min 106 manat olub.
Amma ötən bir ildə “Simplex” universitet üçün BP Eksploreyşn (Kaspian Si) Limited Şirkətinin Azərbaycan Respublikasındakı Nümayəndəliyi tərəfindən ayrılmış qrant hesabına avadanlığın satınalınmasını da reallaşdırıb. Bu razılaşma isə 995 min 700 manat təşkil edib.
Qeyd edək ki, “Simplex” QSC (VÖEN 2601600121) 2015-ci ilin iyunun 4-də yaradılıb. Özəl şirkət Bakı Şəhəri Nəsimi Rayonu, Cəlil Məmmədquluzadə, Ev 102a, Sity Point ünvanında qeydiyyatdadır. Şirkətin qanuni təmsilçisi Fətullayev Elmir Tofiq oğludur. Şirkətə faktiki rəhbərliyin isə Seymur İsmayılov adlı şəxsin rəhbərlik etdiyinə dair məlumatlar var. S.İsmayılov bir neçə il bundan öncəyə qədər təhsil nazirinin müşaviri olub.Tribunainfo.az
Tərəfləri də dinləməyə hazırıq.
XALQ.online
