Təhsildəki OYUN pozulacaq, yoxsa ədalətsizliyə davam edəcəklər???
Son zamanlar təhsil sistemində baş verənlər, təhsildən gələn şikayətlər bitib-tükənmək bilmir. Sanki hər qurum bir digərini məhv etməyə çalışır. Ekspertlər isə sanki hərəsi bir quruma "işləyir".
Keçirilən sertifikasiya imtahanında şəffaflığın qorunmaması, yerlərin satılması, sualların qəlizliyi, vaxt faktorunun nəzərə alınmaması haqda kifayət qədər sosial şəbəkədə informasiya mövcuddur. Maraqlı budur ki, heç nə birdən-birə olmur. Görünür ki, hər biri öncədən planlanmışdır. Bu baxımdan Nazirlik bu vəziyyəti gözləyirdi və soyuqqanlı bir şəkildə oyununu oynamağa davam edir.
Sualların ortada olmaması Nazirliyin oyununu peşəkar səviyyədə qurmasına kömək edir. Çünki kənardan nə qədər şikayət edilsə də, əldə dəlil olmaması onların işinə gəlir. Onu da qeyd edək ki, söhbət sadəcə AZƏRBAYCAN DİLİ VƏ ƏDƏBİYYAT, DÖVLƏT DİLİ, İNGİLİS DİLİ, KİMYA fənn suallarından deyil, həm də METODİKADAN gedir. Çünki bu fənlərdən suallar düzgün hazırlanmamışdır. Gəlin qəbul edək ki, suallar SAVAD YOXLAMAQ üçün deyildi. Sadəcə oyun oynamaq məqsədi daşıyırdı.
Mənzərəyə gəlin bir az kənardan baxaq: Məktəbdə iki ədəbiyyat müəllimi var. Biri 54 bal yığıb, digəri 32 bal. Amma ikinci müəllimin nəticələri çox yüksəkdir, hazırlıq keçir, şagirdləri buraxılış və blok imtahanlarında yüksək nəticə göstərir. Kənardan biri düşünür ki, ikinci müəllim savadsız imiş. Əslində isə Nazirliyin oyununun qurbanıdır..
... və ya
Məktəbdə bütün ingilis dili, kimya, dövlət dili, azərbaycan dili və ədəbiyyatı müəllimləri savadsızdır, digər fənn müəllimləri savadlıdır. Azərbaycanda kimya müəllimi yoxdur, Azərbaycanda dövlət dili müəllimi yoxdur və s...
Bu nə dərəcə düzgündür...
Müəllimlər ayağa qalxıb, mitinq edir, şikayət edir, haqqın tələb edir. Əgər Nazirlik hər şeyi şəffaf edibsə, niyə sualları ortaya çıxarmır???.
Bundan əvvəlki il sualları açıb göstərən, nə qədər savadsız müəllim olduğunu gülərək deyən, Təhsil TV tərəfindən sualları İZAH EDƏ BİLMƏYƏN kütlə indi niyə susub??? Sərf eləmir? Oyun ortaya çıxar???
Əslində hər kəs hər şeyi bilir. Sadəcə məsələ burasındadır ki, oyunu oynayanlar öz qərarlarını çoxdan veriblər...
Vəfa Yaqublu deyir, suallar məktəb səviyyəsində, dərslik səviyyəsində olacaq. Yaxşı, onda alternativ olaraq dərslikdən nümunələrlə gətirin bizim qarşımıza qoyun. ƏDALƏTLİ OLUN!
Nəzakət Mehdiyeva deyir ki, biz sadəcə savadı ölçürük, 5 il müddətində heç bir dəyişiklik olmayacaq, bu müəllimlərə haqsızlıq olar və s. O zaman Azərbaycan dili və ədəbiyyat müəllimləri, kimya, dövlət dili, ingilis dili müəllimlərinə, siz ədalətli davrandınız??? Keçən il ingilis dili "to be" sualları idi, indi "dastan", keçən il dövlət dili " sait, samit" idi, indi götürüb elmi, qəliz mətnləri qoymusunuz. Məgər kimya fənninə aid mətni dövlət dili müəllimi bilməlidir??? Bu oxuyub anlama deyil, insanları aldatmayın. Bu oyundur. Gətirin sualları izah edin. ƏDALƏTLİ OLUN!.
Nurlan İsmayılbəyli deyir ki, meyarlar əsas götürülür, keyfiyyət ölçülür və s. Siz hələ keyfiyyətin nə olduğunu öyrənin, meyarın nə olduğunu öyrənin, sonra işinizi qurun. Çünki dediklərinizlə etdiklərinizin heç bir əlaqəsi yoxdur. ƏDALƏTLİ OLUN!
Emin Əmrullayev deyir, bir neçə il sonra təhsildə savadsız müəllim qalmayacaq, biz müəllimlərin yanındayıq. Hansı ki, bütün bunlar olarkən heç bir addım atmır. Açıq şəkildə görünür ki, bunlar anidən olmur. Bunlar planlıdır. Heç bir sual hazırlayan müəllim 3 mərhələli məsələ yazmaq, azərbaycan dili müəlliminə terminlərlə dolu fərqli fənlərə aid elmi mətnlər yazmaq düşüncəsində olmur. Ona deyirlər, yaz. O da yazır. Deməli, burda hər şey planlıdır. Sualı yazan, hazırlayan, təqdim edən və danışanlar- hər biri bu oyunun bir hissəsidir.
EŞQİ BAĞIROV heç nə olmamış kimi rahatca vəzifəsindədir. Bütün oyunların başında dursa da, hər kəsi bir-birinin üzərinə salır və özünü günahsız elan edir. Halbuki bu olanlarda əsl günahkar məhz MÜTDA-dır.
Bəzən təəssüf edirik ki, hətta Emin Əmrullayev də Eşqi Bağırovun bu qərarlarına, oyunlarına təsir edə bilmir. Çünki bizdə hələ də "dayday", "pul", "arxa" ön plandadır.
Oyuna davam edən, müəllimi gözdən salan, ədaləti doğrulmayan, müəllimləri mitinqə məcbur edən və ayrı-seçkilik yaradan bir qurumdan bəhs edirik.
Bəs ATİAHİ niyə müəllimlərin haqqını tələb etmir, niyə müəllimlərin hüququnu qorumur, niyə heç bir addım görmürük? Müəllimlərin maaşından 2 faiz tutmaqla, pulsilmə əməliyyatları ilə məşğul olmaü, hətta haqsız yerə müəllimləri işdən çıxararkən saxta aktlaşdırma işlərinə baxırlar, amma müəllimlərin tərəfini tutmaq lazım gələndə heç bir addım atdığını görmürük. Onda niyə var bu qurum???
Müəllim şərəfli bir peşədir-deyilirdi. Artıq bu cümlə insanlarda sadəcə ikrah hissi yaradır. Artıq abituriyentlər sadəcə müəllim olmaq istəmir.
Müəllim adı yerlə bir olub. Hətta işsizlərin sayı artır. Getdikcə, vəziyyət daha da gərginləşir. Ölkəmizdə işsiz müəllim ordusu və bitməyən xaoslar çoxalır. Artıq diplomun, müəllim olmağın bir əhəmiyyəti qalmayıb. Sadəcə dayday və pul... Sanki insanları "pis yola salmaq" üçün zorlayır, cəmiyyəti korlamaq üçün əllərindən gələni edirlər....
