İkinci dərəcəli fənn yoxdur: bütün müəllimlər sertifikasiyaya cəlb olunacaq
Bu gün müəllimlərin sertifikasiya imtahanları başlayır. Müəllimlərin sertifikasiyaya cəlb olunması ilk dəfə 2022-ci ildə baş tutub.
“Dövlət ümumi təhsil müəssisələrində (ümumi təhsil üzrə təhsilverənlərə münasibətdə digər dövlət təhsil müəssisələrində) işləyən təhsilverənlərin sertifikatlaşdırma Qaydası”na uyğun olaraq 2022-ci ilin 30 avqust - 1 sentyabr və 13 sentyabr tarixlərində sertifikatlaşdırmanın test mərhələsi keçirilib.
Test mərhələsində ümumilikdə 11 133 nəfər müəllim iştirak edib və onlardan 8 766 nəfər təhsilverən müəyyənləşdirilmiş keçid balını toplayıb.Test mərhələsində iştirak edən təhsilverənlərin hər biri ibtidai sinif müəllimi olub.
2023-cü ildə isə 28 min müəllim sertifikasiyaya cəlb olunub. Ümumilikdə imtahana cəlb olunanların 8 500 nəfəri Azərbaycan dili və ədəbiyyat, 19 500 nəfəri isə ibtidai sinif müəllimi olub.
2024-cü ildə isə ibtidai sinif, Azərbaycan dili və ədəbiyyat müəllimləri ilə birlikdə, xarici dil (alman dili, fransız dili, rus dili və ədəbiyyatı və s.), eləcə də Azərbaycan dili (rus bölməsi), həmçinin riyaziyyat və ingilis dili müəllimləri ilk dəfə sertifikasiyaya cəlb olunublar.
Qeyd edək ki, 2022-2024-cü illər ərzində 65 min nəfərə yaxın müəllim sertifikatlaşdırmaya cəlb edilib. İndiyə kimi sertifikatlaşdırma prosesini uğurla keçmiş müəllimlərin ümumi sayı isə 55 min nəfər olub.
2025-ci ildə ilk dəfə fizika, kimya, biologiya, coğrafiya və informatika müəllimlərini sertifikasiyaya cəlb olunacaq. 18-25 iyun tarixlərində keçiriləcək sertifikasiya imtahanında ümumilikdə 19 min müəllim iştirak edəcək. Eyni zamanda bu tarixlərdə ötən il sertifikasiya imtahanından kəsilən müəllimlərin ikinci şans imtahanı da baş tutacaq.
Modern.az-ın məlumatına görə, ötən gün Məktəbəqədər və Ümumi Təhsil üzrə Dövlət Agentliyinin və Təhsil İnstitunun müəllimlərin sertifikasiya imtahanı ilə bağlı birlikdə təşkil etdiyi brifinqdə isə vurğulanıb ki, gələcək 10 il ərzində ölkə üzrə bütün fənlər üzrə bütün müəllimlər sertifikasiyadan tam cəlb olunacağı planlaşdırılıb.
Rəsmilər vurğulayıb ki, təhsildə ikinci dərəcəli fənn yoxdur və bu cür hesab edilən dərslər şagirdlərimizdə əqli inkişafı və elmi dünya görüşü artırılmasına xidmət edir. Bu səbəbdən də bütün müəllimlərin sertifikasiyaya cəlb olunması labüddür.
