Ortaq Türk Dünyası məktəblilərarası tarix olimpiadası keçiriləcək
"Heydər Əliyev İli”nə həsr olunmuş Ortaq Türk Dünyası məktəblilərarası tarix olimpiadası keçiriləcək.
Bu barədə BŞTİ-dən tehsilmedia.info-a məlumat verilib.
Bildirilib ki,Türk ölkələri arasında ilk dəfə keçiriləcək olimpiadanın təşkilində əsas məqsəd ortaq milli köklərimizlə, dəyərlərimizlə, mədəniyyətimizlə, dilimizin, dinimizin eyniliyi ilə sıx bağlı olduğumuz türk xalqlarının birliyinin təcəssümü, gənc nəslin vətənpərvərlik ruhunda tərbiyəsi, türk xalqları tarixinin hərtərəfli öyrənilməsi, ortaq mənəvi dəyərlərə sadiq gənclərin formalaşması prosesinə və qarşılıqlı əməkdaşlığın inkişafına dəstək verilməsindən ibarətdir.
Olimpiadada türk ölkələrindən 14-16 yaşlı şagirdlər iştirak edəcək. Olimpiada 3 mərhələdə (məktəb, ölkə mərhələsi, final mərhələsi) təşkil olunacaq. Suallar qədim və müasir ortaq türk tarixini və mədəniyyətini əhatə edəcək.
Olimpiadanın I və II mərhələsi hər ölkənin özündə keçiriləcək. II mərhələnin nəticələrinə əsasən, hər ölkə üzrə III mərhələdə iştirak edəcək 6 şagird müəyyənləşdirilərək Azərbaycana göndəriləcək.
Türk ölkələrini təmsil edən komandalar 29 may 2023-cü il tarixində olimpiadanın Bakıda keçiriləcək final mərhələsində və iyunun 1-də Şuşada keçirilməsi nəzərdə tutulan "Heydər Əliyev-türk dünyası birliyinin böyük carçısı” adlı beynəlxalq uşaq rəqs festivalında iştirak edəcək.
Qeyd edək ki, final mərhələsinin nəticələrinə əsasən, hər ölkədən 1 nəfər I yerə (onlardan ən yüksək nəticə əldə edən 1 nəfər "Birincilərin birincisi” adını qazanacaq), 1 nəfər II yerə, 1 nəfər III yerə layiq görüləcək. Digər iştirakçılara sertifikat təqdim olunacaq.
Qalib şagirdlərin mükafatlandırılma mərasiminin Bakıda keçirilməsi nəzərdə tutulub.
Onu da qeyd edək ki, Ortaq Türk Dünyası məktəblilərarası tarix olimpiadasına həsr olunmuş sayt da (https://otdo.edu.az) yaradılıb. Saytda türk ölkələrinin hər birinin tarixinə, mədəniyyətinə və digər müvafiq mövzulara həsr olunmuş məlumatlar öz əksini tapıb. Sayt olimpiadadan sonra da öz fəaliyyətini davam etdirəcək.
