Uşaq müdafiəsi və təhlükəsizliyi mövzusunda keçirilən görüşlər davam edir - FOTO
Məktəb və məktəbəqədər təhsil müəssisələrinin rəhbərləri ilə uşaq müdafiəsi və təhlükəsizliyi mövzusunda keçirilən görüşlər davam edir.
Bu barədə Bakı Şəhəri üzrə Təhsil İdarəsindən məlumat verilib.
Bildirilib ki, növbəti görüşlər Nəsimi, Xəzər və Pirallahı rayonlarını əhatə edib. Görüşlərdə iştirakçılara layihənin əhəmiyyəti barədə məlumat verilib. Qeyd olunub ki, məktəbyaşlı uşaqlarla əlaqədar baş verən xüsusi hallar, həssas qruplara daxil olan uşaqlarla işə diqqətin artırılması, eyni zamanda, layihə çərçivəsində valideynlərlə əməkdaşlıq mühüm əhəmiyyət daşıyır. Bundan əlavə, görüşlərdə uşaqlara qarşı zorakılığın qarşısının alınması, zorakılığa məruz qalan uşaqlar və hüquq pozuntusu törətmiş uşaqlara sosial, psixoloji, hüquqi xidmətlərin təşkili məsələlərinə də toxunulub.
Görüşlərdə uşaqların müdafiəsinin daha səmərəli təşkili istiqamətində müvafiq təkliflər irəli sürülüb, mövzu ətrafında fikir mübadiləsi aparılıb, iştirakçıları maraqlandıran suallar cavablandırılıb.
Qeyd edək ki, Elm və Təhsil Nazirliyi ilə BMT-nin Uşaq Fondunun (UNICEF) Azərbaycandakı Nümayəndəliyinin birgə təşkilatçılığı ilə keçirilən görüşlərin paytaxtın digər inzibati rayonları üzrə də davam etdirilməsi nəzərdə tutulur.
