5 yaşlı uşaqlar riyaziyyat üzrə 8 ölkə arasında 2-ci olub

“Nəticələrə əsasən Azərbaycanlı 5 yaşlı uşaqlar riyazi savadlılıq üzrə yüksək nəticə göstərərək iştirak edən 8 ölkə arasında ikinci yeri tutublar”.

AzEdu.az xəbər verir ki, bu sözləri Təhsil İnstitutunun direktoru səlahiyyətlərini müvəqqəti icra edən Elnur Əliyev jurnalistlərə açıqlamasında qeyd edib.

“Bu, xüsusilə iştirakçı ölkələrin əksəriyyətinin inkişaf etmiş ölkələr olduğunu nəzərə alsaq, qənaətbəxş göstərici hesab olunur. Bununla belə, maraqlı məqam ondan ibarətdir ki, riyazi bacarıqlar yüksək olsa da, uşaqların təməl savadlılıq göstəriciləri orta səviyyədən bir qədər aşağı olub.

Bu isə gələcək mərhələdə səbəblərin araşdırılması, təhsil proqramlarının keyfiyyətinin təhlili və tərbiyəçilərin peşəkar inkişafına daha çox diqqət yetirilməsini zəruri edir”.

Emosional inkişafla bağlı nəticələrə toxunan Elnur Əliyev qeyd edib ki, uşaqların emosiyaları tanıma, ayırd etmə və müəyyənləşdirmə bacarıqları üzrə göstəriciləri 8 ölkənin orta səviyyəsinə yaxındır:

“Güvən və davranışla bağlı nəticələr isə valideynlər və tərbiyəçilər arasında keçirilmiş sorğular əsasında müəyyən edilib. Bu sahədə də göstəricilər orta səviyyəyə yaxın olsa da, ən yüksək nəticə göstərən ölkələr sırasına daxil deyil.

Araşdırma anaların təhsil səviyyəsinin uşaqların nəticələrinə ciddi təsir etdiyini də üzə çıxarıb. Belə ki, ali təhsilli anaların uşaqları riyazi savadlılıq üzrə 36 bal, təməl savadlılıq üzrə isə 22 bal daha yüksək nəticə göstəriblər. Bu fərq əhəmiyyətli hesab olunur.

Bundan əlavə, rəqəmsal alətlərdən istifadənin uşaqların inkişafına təsiri də araşdırılıb. Məlum olub ki, bu alətlərdən tez-tez istifadə edən uşaqların nəticələri daha aşağıdır. Ümumilikdə isə rəqəmsal vasitələrin istifadəsinin uşaqların göstəricilərinin artmasına müsbət təsiri müşahidə edilməyib".

Elnur Əliyev hesabatda qeyd olunan digər vacib məqamlara da diqqət çəkib. Onun sözlərinə görə, bu yaşda uşaqların inkişafına ən çox təsir edən üç əsas amil müəyyən edilib: ev mühiti, valideynlərin təhsil səviyyəsi və uşaqların erkən yaşdan məktəbəqədər təhsilə cəlb olunması. Bu amillər uşaqların inkişafında həlledici rol oynayır.